【盤房來料】 港股受制廿日線 百日線變得岌岌可危(010926).docx

港股受制廿日線 百日線變得岌岌可危 中東局勢再度惡化，美國總統特朗普喺霍士新聞訪問中揚言，將對伊朗襲擊美軍事件作出回應，油價再因美伊關係惡化而上升。另一方面。聯儲局加息陰霾揮之不去，美股周一於8月份最後一個交易日顯著受壓。道指低開97點後，跌幅擴大至最多436點，低見53123，收市道指跌374點或0.7%，報53185；標指跌25點或0.33%，報7686；納指跌31點或0.12%，報收26370。 Nvidia收市升1.4%，公司宣布以購買可換股債券方式，向台灣聯發科投資35億美元，雙方並加強技術合作，以助數據中心內不同組件之間實現更暢順傳輸。雖然阿Man已無短炒嘅NVDA喺手，但長線持有嘅貨仲牢牢坐定，股價上返220都係好事。MU上星期中咗908一注，噚晚都算生性，完全無再穿930，終於上返50MA企定定，今晚略為將個防守位上移去20MA928，企定穩就等等，想博股價上返個range頂，大約係980-1000。MRVL中埋210，暫時股價有少少腳軟，都係望實個200防守位，今晚最好嗱嗱聲收復條10MA同20MA，上返230樓上。DELL上周五450落咗車，噚晚都無位上返車，早段股價仲上到470樓上，不過收市又穿返460，唯有再睇睇今晚乜嘢料，435同445各擺咗一個買盤，用420做防守。CRWV差少少都係買唔到82嗰一注，86接咗嘅貨持有中，今晚再睇加注定走人。GOOG穿返幾條移動平均線，愈來愈接近250MA，擺買盤320，250MA317，接近一注短炒，如果接到貨用300做防守。NQ愈玩愈窄，今晚分水嶺29450，支持29350/29250/29150，阻力29550/29650/29750。 油價回升，石油股獲買盤吸納，雪佛龍及埃克森美孚股價分別升2.1%及2.7%，雪佛龍為升幅最大道指成份股；航空股則受壓，美國航空、達美航空及聯合航空跌幅介乎1.5%至2.6%。聯儲局今年餘下時間加息機會大增，現貨金價一度跌1.31%見4396.7美元，收報4449.19美元，微跌0.13%。睇嚟個金價喺4500美元前又要整固。GAMA資產管理環球宏觀投資組合經理Rajeev De Mello表示，聯儲局立場轉鷹令唔少投資者十分意外，短線而言，對金價構成逆風威脅，預計短期金價將回落至4200及4300美元，但將繼續持有黃金作長線投資。美國10年期債息自去年1月以來首次升穿4.75厘，漲4.6個基點至4.764厘，對息口較敏感嘅2年期債息則回落3.91個基點，至4.3043厘。美滙指數曾跌0.31%至99.39，日圓反覆漲0.38%至159.48兌每美元。 港股於8月最後一個交易日先跌後回穩，早段恒指低開164點，一度跌294點見25290半日低位，其後收復大部份失地，全日跌17點，報收25566，成交額增至3148億元，主要因為MSCI指數進行調整，rebalancing下令成交急增，並非因為指數反彈而增加。恒指今早低開151點或0.59%，報25415，噚日大市已見受制10日線及20日線，走勢開始轉弱，今日跌幅擴大至最多跌326點，低見25240，接近100日線(25232點)見支持，但反彈力度卻一般，只係跌勢稍為緩和，100日線岌岌可危，隨時失守。恒指半日跌256點或1%，報25310，半日成交1331.65億元，MSCI噚日收市前完成rebalancing後，今日成交又回復淡靜。 港股於8月份表現麻麻，在7月反彈逾3000點後，8月於25000-26000水平整固，但喺全球主要股指中排行較後。港股於8月份整固味濃，個別投資者憧憬波幅收窄後，9月或有力突破向上，然而近日港股表現卻難言樂觀。恒指由2024年低位約15000水平回升，至去年8月升穿25000水平，便進入大概2000點調整區，估值復修都完成七七八八。至今年初升至28000水平後，持續向下調整，6月又重返23000水平、7月「V彈」再作短線估值復修並返回25000-26000橫行區。而按今年1月及5月分別衝上28000及27000後均見急速下跌，技術走勢已形成一浪低於一浪。8月份恒指再失250日線，加上成交方面一直未能配合，反映買家入市態度欠積極，似乎未有條件向上突破。如短期港股未有新催化劑，港股反而再向下考驗50日線約24850，甚至24000大關機會更大。