【盤房來料】 資金換馬傳統科技股推動指數回升(020626).docx

資金換馬傳統科技股推動指數回升 伊朗不滿以色列對黎巴嫩持續軍事行動，暫停與美國進行對話，同時計劃徹底封鎖霍爾木茲海峽，甚至有意於曼德海峽等其他「戰線」開啟行動，受呢個消息刺激油價急升，美股於6月份首個交易日表現反覆。美股開市表現偏軟，道指一度跌265點報50767；其後三大指數扭轉跌勢，反覆回升，三大指數更再齊創即市及收市新高。道指倒升46點或0.09%，報51078；標指倒升19點或0.26%，報7599；納指升114點或0.42%，報27086。 噚日未開市就走晒啲CRWV，到開市見個勢仲幾似樣，一開市就狗衝返118，呢一段佢唔穿返110，好想博佢再破前頂138，決定唔鬼理段永平已清倉，跟住個勢再炒過。至於PL噚晚繼續插水，但好彩40-42個防守位無穿過，望佢調整完，嗱嗱臨上返50樓上，再組織升勢。NBIS同INTC放埋一邊唔鬼理住，總之前者唔穿返230，後者唔穿100，由佢放飛。MU上到四位數，一樣唔理住，防守位暫時推上980。ONDS又喺13.5沽返11.88嗰啲貨出去，轉頭掛返入12.08，差少少中唔到，今晚再等等。另外之前喺10.88入咗啲CRML，想等個合理價見返15先，依家似乎有少少偏低。 美股升勢停不了，目前唔少最高風險嘅科技股股份亦被炒起，有華爾街從業員提出警告。高盛追蹤一籃子「無利潤科技股」於5月份上漲27%，大幅跑贏納指100指數升幅，跑贏幅度為2020年11月以來最大。摩根大通美國市場情報主管Andrew Tyler警告，投資者應對科技板塊中最火熱部分保持警惕，特別係債息維持高企，可能對規模較小及正在虧損企業構成最大打擊。而規模較大及利潤較高嘅科企正回購股份，投資者應轉投高質素科技股。基於呢個原因，又見GOOG因為集資加大支持而回落，365買返啲GOOG，防守350， 美國10年期債息曾升8.09個基點，報4.5163厘，其後輕微倒跌；2年期債息漲8.44個基點，報4.0884厘。美滙指數一度上升0.45%，報99.385；日圓下跌0.31%，低見159.76兌每美元。中東局勢又再度繃緊，刺激油價急升， 紐約期油曾抽8.49%，高見每桶94.78美元，收報92.16美元仍升5.49%，至於目前紐約期油於亞洲時段仍高企於90美元之上。 港股喺6月首個交易日反彈，恒指高開2點後，一度升304點至25486，曾重越10日線約25463，收市報25398，10日線得而復失，成交額3309億元，北水表現飄忽，午前淨流入，至午後卻再度錄得淨流出。不過市場已逐步消化有關券商為中國境內客戶進行非法跨境交易事件，及本地證監會調查券商就IPO違規事件，大市於上周創逾一個月低位後，逐步回穩，加上技術指標短線呈嚴重超賣，港股短線作出反彈亦合理。恒生指數低開3點後隨即止跌回穩，隨後升幅顯著擴大至逾400點，半日收升370點，重越50日線(現處25729)及俗稱牛熊分界線嘅250日線(現處25675)。北水噚日下半場走佬，今早又再錄得淨流入，出出入入坐唔定，半日成交額2000.9億，多得北水呢啲炒鬼炒出炒入。如午後能企穩10日線及50日線，有條件進一步上試20日線約25850，但能否即市企穩則有待觀察。如能企穩25850條20日線，則下一個反彈目標為100日線，約26130水平。港股今日嘅升勢，主要來自資金換馬，從半新股再度流入傳統科技股，後市港股能否重拾升勢，要睇呢啲換馬盤能否持續，若然呢啲換馬盤一兩日貨仔又停手，港股就算上星期已搵到個底，短線或者都只係區間上落。