【盤房來料】 港股企穩二萬三方能延續反彈(020726).docx

港股企穩二萬三方能延續反彈 噚日港股七一假期，慶回歸放假，而美股喺下半年首個交易日腳軟。美國聯儲局主席沃什(Kevin Warsh，以為阿Man以沃爺稱呼佢)周三喺葡萄牙舉行嘅歐洲央行年會上，重申唔會就未來利率政策提供前瞻指引，當局正在制定新路線。佢指出通脹壓力近周有所減退，同時重申令通脹回復到2%目標決心，又強調當局決定合適政策方向上具有自主權，央行長期以來獨立性唔會改變。市場解讀係聯儲局仍然以通脹回復至2%係目標，若然通脹長期高企，咁加息可能係聯儲局選項之一。 道指低開88點後，跌幅擴大至最多292點，低見52026點，隨後一度掉頭回升423點，破頂曾見52742，收市道指報52305，僅跌13點；標指回吐0.22%，報7483；納指則跌173點或0.66%，報26040。重磅股中，彭博報道，Meta計劃建立雲端業務，出售剩餘的AI算力，與亞馬遜的AWS及微軟Azure競爭，股價收市炒高8.8%，不過阿Man噚日開始病病地，只係自己短炒股有擺定啲食糊盤，完全無參與過day trade。MU喺1040撈嘅貨，都預佢1180-1200有阻力，心目中都打算有100-120利潤食咗先，擺個1158又竟然走到，又擺返個1050接返，都係睇住20MA個位，誰知今早韓國嗰邊嘅三星同海力士大幅回落，拖到MU去到1000邊，相當接近5周線1028同30日線991，暫時用個980做防守，今晚唔上返1050企穩，可能都要同佢短暫分手。NBIS穿咗250仲有得落，下個支持係條50MA214，守得到先再算，暫時走勢開始轉弱，隨時穿埋50MA，連條上升軌都打爆。DELL喺380同395兩注貨，見有10%利潤，428又減半先，睇個款好似要行返個range做整固，380-440之間炒下上落，都係用370做防守，穿埋或者要到350條10周線搵支持。INTC忍唔住喺138減半，佢個款同DELL有啲似，或者又係行吓先，110-140之間上落，拎一半flip住先，減低持貨成本。KLAR上過22樓上，16.8一路坐住嘅貨，足足贏咗三成，減返一半，博下回調有19至19.5撈返，用17元做防守。MRVL同樣掛咗298減半，大家可能奇怪點解阿Man掛親啲位都係8字尾，其實都係啲齊頭位附近減返少少，8字尾純粹好意頭，戰友都覺得咁做好鬼無聊。MRVL防守位睇位250，上返290企定定行就心定啲，留意250係日線保力加底，去到呢啲位要識彈，唔識彈就要考慮撤退先。 因為汱爺嘅講話，市場解讀為聯儲局為達到通脹目標，唔排除會以加息作選項，帶動美國10年期債息曾漲7.9個基點，至4.501厘；對息口較敏感嘅2年期債息漲5.2個基點，至4.191厘。美滙指數最多升0.41%至101.6。日圓再創40年低位後，曾倒升0.17%至162.3兌每美元。至於個NQ暫時喺29900至30600之間整固，今晚NQ個好淡分水嶺30050，支持29950/29850/29750/29650，下破29650就睇住29550/29450/29350-29300；阻力30150/30250/30350/30450，突破30450上面睇返30550/30650/30750-30800。 港股呢邊7月開局算係咁，話晒跌咗兩個月，五窮六絕後七唔翻到身都應該反彈吓。恒指高開190點，報23071，好友出盡力，大市最多升454點，報23335點，可惜外圍風雨飄搖，淡友又未死心，升幅曾收窄至僅剩102點，低見22983，其後好友力托恒指重上二萬三，中午收升273點或1.2%，報23154。半日成交2133.87億元，北水淨流入41.25億元。港股目前已有條件反彈，不過都係嗰句，反彈之路荊棘滿途，上方阻力重重，要延續反彈，最低條件係企穩23000，今日收市如果連23000都失守，即係好友仍處於捱打狀態，暫時反擊力量有限。