【盤房來料】 港股回穩市場憧憬阿爺出手救市(021126).docx

港股回穩市場憧憬阿爺出手救市 上周美股一直受到企業盈利表現及下一季展望指數所影響，至周五美股表現仍不振，納指一度挫近4%，已較高位回落一成，技術上進入調整區。納指收市跌747點或2.86%，報收25437。道指盤中曾跌778點，收市跌572點或1.09%，報收51770；標指則跌1.82%或140點，報收7580。 AMZN大舉投資AI導致現金流呈負數，加上第三季收入遜色，股價一度急挫5.9%，收市跌幅收窄至1.4%。暫時喺240附近，剛好係50周線同250日線，而100周線喺228，呢啲位好似博得過，阿Man擺咗買盤喺240同230，用個200/220做防守，睇下中唔中。至於LITE死得好唔抵，盤中止咗830，收市盤後上返845，今早美國夜盤上返870樓上，又上返條5日線仲企埋條10日線同100日線，睇到阿Man有少少心理唔平衡，擺返個870同830買盤，若然中晒嘅話，用返個800-820做防守，上周五低位805，最多再穿周五低位走人。阿Man對LITE有啲死心不息，除咗係同MRVL有潛在拼購之外，另一個原因係LITE彈起上嚟都幾好力，之前買中個底，都贏唔少，有本錢可以再博下。GOOG插到死死下，暫時仲未出手，但守到280條20月線亦可以考慮下，270呢個底守到，又唔係太差。INTC同樣係業績後急跌，70接咗一注後，係用個65做防守，望真啲條20個月線原來喺57，結果喺64加多一注，均價67，就用條20月線做防守，都係想博上返條250日線77左右。MSFT繼續守住510條50日線，最好係盡快企返530條20MA。DELL雖然都有得彈下，但暫時唔考慮住，寧願等佢企穩啲再算。ALAB明日公布季績，本來個止蝕位係定咗喺250，但見條50周線喺239，守到230決定持有先，不過270上車嘅貨，今晚上唔返280，要諗下業績前先落車。SPCX暫時均價145嘅貨，坐緊艇，130-135防守位叫守到，呢個星期最好上返145-155，企返條20日線153先叫安全。NBIS已止蝕咗155，唔企返160條250日線，暫時唔考慮。MRVL中埋200個買盤，均價210嘅貨，都係用180做防守止蝕，呢個星期200都企唔穩嘅話，隨時跳車。MU叫做硬淨，880另外半注中埋，均價895嘅貨，用850做防守，博上返去950條20MA。 美國中期選舉將於明日舉行，但上周五美國媒體三名海灣國家高級官員透露，特朗普政府已向海灣盟友通報情況，準備最早於11月4日，即中期選舉後翌日，對伊朗發動短暫而猛烈空襲。特朗普喺中期選舉前發表講話時表示，相信與伊朗戰爭即將結束，但並未說明具體將如何實現。紐約期油抽升2.08%，收報每桶104.12美元，布蘭特期油漲2.4%收報117.64。美國10年期債息一度下滑4.71基點至4.8898厘，2年期債息降4.55基點至4.5524厘。美滙指數曾回落0.49%至101.54；日本央行維持加息立場，日圓揚0.48%。美國聖路易斯聯儲總裁穆薩萊姆表示，聯儲局需要進一步加息，而且應盡快行動，通脹方能回到局方2%目標水平。 美國中期大選為全球焦點，於大選前市場避險情緒高漲，因美國兩黨無論勝誰負，其後定必將其政策進向更激進情況，亦正暗中透支美國國債信用。面對國內長年被高油價與地緣供應鏈危機，核心通脹持續高企，美聯儲於選後將更為進取，有機會迅速回復其應有貨幣緊縮與加息速度，以捍衞美元正動搖嘅國際地位。要有心理準備美聯儲鷹派反撲，對於早已處於歷史估值極高水平、融漲風險正如履薄冰嘅美股，或有機會出現灰犀牛。不過，與此同時，中國經濟喺政策「組合拳」調控下，近期公布嘅宏觀經濟數據已逐步改善，亦可解釋近日港股於外圍股市表現疲軟情況下，於23000水平似乎仍有一定支持。留意APEC峰會將於11月舉行，全球資金或於峰會後再進行配置調整，中港股市或有機會成為部份資金避風港。另一方面，中國金融監管機構據報今日將與銀行及券商舉行會議，討論支持資本市場措施。市場憧憬阿爺出手救市，喺貨幣等政策方面採取更多行動以支持消費支出，以刺激經濟回暖。A股今早顯著反彈，不過港股表現較為反覆。 恒指高開7點，報23301，早段升幅擴大至最多248點，高見23543，但北水又走貨，升幅逐步蒸發並曾倒跌23點，低見23271守住條10日線回穩，A股愈升愈有，港股亦回勇，重上23400水平，半日報收23437，升142點，成交額半日1141.45億元，雖然北水錄得16.81億元淨流出，但成交似乎好返啲，唔排除阿爺出手後，港股會有大少少收復空間。暫時都係睇住條10日線23250，另外仲有5日線23150，守得到呢兩個位，呢個星期仍有機會上返去23600補裂口，企到裂口頂23600，就試下挑戰埋條20日線23700，暫時23700阻力仍大。