【盤房來料】 加稅傳聞震散騰訊 令大市反彈動力減弱(030226).docx

加稅傳聞震散騰訊 令大市反彈動力減弱 上周五黃金同白銀高台跳水，不過隔晚於美股市場大幅反彈，跌幅大大收窄，加上美國最新公布嘅製造業數據遠勝預期，美股先跌後回穩。道指低開114點後，反彈最多592點，高見49484，收市升幅略為回順，升515點或1.05%，報49407；標指升37點或0.54%，報6976；納指升130點或0.56%，報23592。PLTR第四季度營收及每股盈利均高於市場預期，同時給出遠高於市場預期的第一季度及全年營收指引，業績公布後，股價於盤後急升逾一成。其實此股一向估值都唔算平，加上軟件股估值收縮，如果有貨，可以用160美元止賺等下，或直接起筷食糊。今日有隻心水股想吼位，Planet Labs (PL) 係一間衛星影像分析公司，利用自行研發的小型衛星「Dove」每日對地球進行全方位成像。核心業務係提供地球觀測數據、地理空間分析解決方案及 AI 影像分析，主要應用於農業、林業、國防、海事和基礎設施等領域，旨在實現全球數據的「可見、可及、可操作」。公司有瑞典武裝部隊將大單打底，中線收入都有保証，未來將會繼續吸引到世界唔同國家「幫襯」。暫時睇股價喺21美元有支持，短線初步阻力喺25-26，吼位22-23上車，短炒都至少有10%落袋。另外NQ噚日反彈都好有力，一下子就打返穿晒幾個阻力位，而25400/25500/25600啲昨日阻力，就變成今日支持。今晚NQ嘅好淡分水嶺喺25950，支持25850/25750/25650/25550，阻力暫時仍然係26050，企返穩26050，上面再睇26150/26250/26350-26400前頂。 至於黃金方面，暫時就係彈到4850左右止步，不過企得返4850，仲有件彈去5000-5100左右，至於4600-4650呢個前阻力，企返穩會變支持位，暫時黃金都係睇住上落先，4600至5100都有超過10%炒上落，短炒嚟講幅度都夠晒。港股喺2月首個交易日表現麻麻，由於美國特朗普提名嘅聯儲局下任主席沃什(Kevin Warsh)屬於鷹派代表，不過為咗迎合特朗普，沃什近期公開支持減息，令貨幣政策更添不明朗。人選公布後，美股回落、美元走強、債息上升的嘅即時市場反應，反映市場憂慮未來聯儲局獨立性受影響。市場認為沃什雖然已轉軚支持減息，但與其一向主張以縮表控制貨幣供應想法，顯然存在矛盾，除非佢徹底改變理念，否則上任或修正「選舉口號」，亦意味聯儲局亂局或將延續下去，反助力加快全球去美元化步伐。 雖然港股噚日一度急跌879點，收市跌幅雖收窄，但仍跌611點，報收26775，失守10日及20日線，短短兩個交易日累瀉逾千點。不過至夜期時段，美股反彈，除伊朗與美國將展開談判，與此同時，特朗普宣布與印度達成貿易協議，美股三大指數回升，夜期及ADR持續反彈，夜期更一度重上二萬七大關。今早黑期於27000水平附近徘徊，恒生指數人今早高開220點，見26995，早段升幅曾擴大至350點，見27126半日高位，但僅回補噚日小量下跌裂口後又受阻回落，更一度倒跌343點見26431。港股早段倒跌主要受科技股拖累，有消息傳內地或加稅，金融業與網路加值服務成重點關注領域，當中金融業與網路加值服務(如遊戲內購、廣告)因利潤率高、稅負較輕，可能成為下一階段稅率調整目標。呢個消息傳出後，騰訊(00700)一度急插逾5%，其後跌幅收窄至少過4%，但因為呢個消息，恒科插水超過1%。雖然消息未經證實，但內地電訊企業被加稅，係因為電訊服務變成基礎服務，係人民必需服務，已毋須國家政策扶持，呢個係國情問題，咁大家要記住只要有行業是由發展中成人民必需品，就有被加稅可能。而雲及人工智能暫時係國家大力支持行業，喺國策嘅角度睇，似乎依家話加稅可能性唔大；但係啲手遊產業，呢一部份要加稅就唔出奇，所以騰訊畀人咁隊係有原因。不過咁，內地就經常向啲賺錢企業伸手，咁國情同國策難以預測，呢個傳聞點都會困擾相關股份，從而減低咗大市上升動力。 雖然港股連續兩日急瀉逾千點，但目前港股投資情緒仍偏向樂觀，即使隨外圍股市震盪，短期或持續反覆波動，但亦只係超買後借勢回調，而並非扭轉升勢。港股流動性改善與盈利預期上修仍然成立，即使美聯儲局更換主席，仍無改中線美國貨幣政策仍偏向寬鬆、美元內在價值下降趨勢。而中國經濟前景逐步回暖，唔少外資已開始增加配置中港股市。不過短線港股或繼續反覆整固，暫時短線支持為26400-26500，上方彈阻力約為27400，能成功回補昨日下跌裂口，重返5日線即約27400水平之上企穩，則後市仍有望挑戰高位。