【盤房來料】 港股升勢曇花一現再失多條平均線(030626).docx

港股升勢曇花一現再失多條平均線 美伊和平談判未見進展，不過人工智能(AI)基建及晶片股繼續熱炒。美股周二反覆，道指與標指再創即市及收市歷史新高，納指亦微創收市新高。道指早段低開166點後，跌幅曾擴大至249點，其後最多倒升290點， 美市收市，道指升228點或0.45%，報51307；標指升9點或0.13%，報7609，連續5個交易日創新高，並首次收市企7600之上；納指升7點或0.03%，報27093。 最球最大市值公司兼AI巨頭Nvidia陀手黃仁勳，周二與晶片商Marvell行政總裁Matt Murphy參與台北國際電腦展時，點名Marvell將成為下一間市值突破一萬億美元企業，Marvell股價炒高，急升32.5%。見識過DELL同MU呢啲爆升完破頂再爆嘅走勢，開市269狗衝，暫時盤後升勢持續，用個290-300嚟做止賺，有冇本事萬億市值唔知，但暫時連3000億美元都未到，打個五折黃仁勳欽點市值，都有5000億，即係股價上到500美元嘅機會唔係無，暫時就咁睇住先。118狗衝返嘅CRWV，中間上過133，130止賺咗，喺120撈返當係偷一偷位，兩下又返去119，都係睇住個110支持。PL守到40-42反彈，可惜未企穩50美元，唯有再坐一會。NBIS、INTC、MU同埋ONDS暫時持有。GOOG喺365買咗一注，暫時守到350，今晚再睇下點。DELL急回，均價439上車，博佢守430調整完再上，暫時盤後去到435，股價急回之際，似乎上車都係太過急。 至於NQ都係上下，噚日落到30300左右見支持就再上，盤中一度高見30750，話咗唔估頂，總之依家都係睇住支持位先。30600為今晚NQ分水嶺，初步支持30500，下方支持30400/30300，上面暫時30750/30800係初步阻力，企穩埋又創新高唔估頂。 港股於6月有一個好開局，緊接周一反彈，周二恒指略為低開3點後即轉跌為升，午後升幅進一步擴大至646點，全日升640點，報收26038，成交額3737億元。港股噚日反彈，主要因資金由熱炒半新股回流至傳統科技股，其中騰訊(00700)旗下微信據報將推出嵌入式人工智能代理，股價急升一成，重返480水平之上。而美團(03690)業績後亦升近一成，加上阿里巴巴(09988)及京東(09618)齊升逾6%，四股合共貢獻逾300點升幅。可惜，急升完兩日，今日開市又回復弱勢，本來噚日大力掃入傳統科技股嘅資金，再重投半新股嘅科技股懷抱，ATMJ全面走軟。騰訊(00700)據報無法確定何時推出微信AI智能體，要視乎監管審批進度，咁樣講一講，本來興高采列炒緊QQ嘅資金嚇到縮埋一嚿，雖然今日未至於打回原形，但半日跌返3%有多，噚日高追嘅咪話唔傷。 恒指低開85點或0.3%，開市價已為半日高位，淡友噚日畀人挾足一日，今早隨即反擊，大市並愈跌愈有，半日最多跌465點，低見25572，噚日一口氣收復嘅多條移動平均線，除咗條10日線尚健在，其餘穿20、50及250日線，全部得而復失，半日挨近低位收市，跌438點或1.68%，報25599。國指跌183點或2.09%，報8579；科指跌122點或2.35%，報5076。大市半日成交1697.55億元，北水淨流入68.81億元，雖有北水流入仍無補於事，港股仍未扭轉弱勢，昨日反彈升勢曇花一現。港股能否延續升勢，要觀察重磅傳統科技股能否繼續支撐大市向上，暫時最後一道防線10日線約25500不容再失，失守恐怕昨日僅為挾淡倉反彈，港股又回復其尋底之路，再向24800-25000尋找支持。