【盤房來料】 北水終止連日流出 半日淨流入逾百億元(031126).docx

北水終止連日流出 半日淨流入逾百億元 美國周二舉行中期選舉，持續長達八個月嘅美伊戰爭係選舉議題之一；伊朗媒體報道，最高領袖授予政府進行談判權力，以化解與美國衝突，國際油價應聲急回，紐約期油收市跌7.35%，每桶報96.46美元，日內一度跌至95.15美元，跌幅達到8.62%。油價回落，帶動美股周一早段反彈，道指最多曾漲654點，但收市升幅收窄至213點或0.41%，報收51983。科技股早段反彈，可惜後勁不繼，唔少更倒跌收市，拖累標指收市倒跌38點或0.51%，報收7541；以科技股為主嘅納指更倒跌272或1.07%，報收25164。 Alphabet據稱計劃今年第二度發行歐元債券，規模60億歐元，年期介乎2年至19年，息率將遠高過5月時水平，股價跌0.3%；20個月線喺285，一開市失守咗，但阿Man喺280接咗一注，其實GOOG落到呢啲位，PE得返20倍左右，估值平返一截，雖然連續兩個季度出現負現金流，但公司仍有龐大流動資產及現金，應該唔會出現流動性危機，260-280呢啲價上車，用個250做防守，博上返去300-320博裂口，有數得計。不過阿Man個短炒倉，噚晚重創，唔少股份都中咗止蝕，先係MRVL落實以1150億美元(約8970億港元)股份，收購獲Nvdidia支持光通訊元件龍頭LITE，為今年最大宗併購個案，喺整個科技產業中，是次合併僅次於SpaceX與xAI合併，MRVL股東將佔合併後新公司67%股權，交易預期於2028年上半年完成。由於市場擔心收購溢價過高，加上MRVL市有被攤薄負面因素，收購公布後兩股隨即跳水。本來LITE跳咗車係唔應該再有損傷，但阿Man盤前又手多多均價850上返車，結果774再打靶埋，完美演繹亂接飛刀嘅結果。開市後見再手多一次，以為748係特價，結果放低20蚊728走人，今朝瞓醒見股價落到683，睇到眼都突，一晚股價插水近兩成，對比起上一轉阿Man喺1000樓上落車嘅位，跌咗足足三成有突。收購另一主角MRVL同樣大大鑊，全數喺穿咗180就178跳車，目前已險守條250日線165，已經連續兩日裂口下跌，就算想喺條250日線支持位再博，都係今晚睇定啲先，話晒MRVL估值唔算平。ALAB今晚盤後業績，噚晚見遲遲都上唔返250，無奈地喺240跳車先，盤後穿埋250日線236，呢期啲業績股，公布完多數反肚，等今晚業績出埋先再算。至於MU穿850算先跳車，845，但瞓醒見個短炒倉打咗唔少嘢，一有現金又手痕，均價840撈咗注，今晚上唔返850可能又走先，但目前估值落到12倍PE，800呢啲價應該有返一定防守性。 依家美股啲AI股輪流殺估值，似乎要搵返啲有盈利做backup，兼且估值唔貴嘅龍頭股買下，除咗GOOG之外，195-205嘅NVDA亦可以考慮，盤後204先買一注，防守位繼續睇住190。META仲守住600，阿Man喺625已有貨，609加注，加一注放喺601，繼續用590做防守。INTC一直係侵侵支持嘅公司，現價已較高位腰斬，棘手嘅地方係市場預期公司最快要2028年先真正有錢落袋，今明兩年自由現金流仍然係負數。不過INTC阿Man長線倉仲有手免本嘅貨，60-70呢啲位再買返一半貨，投入長線倉，問題應該唔太大。噚日AMZN兩個買盤都運吉，240差少少上唔到車，250日線241似乎仲頂到，先喺243買一注，另一個買盤改咗237，20個月線喺235，都係想加返長倉嘅貨。 摩根士丹利策略員Michael Wilson喺彭博訪問中認為，無論民主黨抑或共和黨贏得美國中期選舉，都應逢低買入美股，有見及此，阿Man就博一博。不過ING首席投資策略員Simon Wiersma表示，與上周五拋售相比，周一反彈相對溫和，並非趁低吸納訊號，佢提醒有關人工智能投資、利率及地緣政治不確定性仍存在；基於呢個原因，選股方面，盡量揀已經有錢賺嘅公司。 港股噚日反覆做好，恒指高開7點後，一度升248點至23534高位，收市升幅收窄至98點，報收23393，成交額2048億元，北水連續第14日錄得淨流出，累計已錄得淨流出417.91億元。由於近日內地A股持續走軟，上證指數更一度跌穿3600大關，逼使阿爺出手托市。為支持資本市場健康穩定發展，中國人民銀行公告指，今日開展證券、基金、保險公司互換便利操作，互換期限1年，可視情展期。目前有31家證券、基金公司申報需求，申請額度超過1000億元人民幣。喺內地政策支持下，港股仍有一定收復空間，而近日資金持續由美股AI相關股份流出，或有機會流入極度落後港股及內地股市，對港股帶嚟一定支持。今早恒指高開76點後，一度倒跌46點，主要係A股即使阿爺出手都仲未識彈，港股畀A股拖低，恒指低見23347後回穩。23383係恒指條100個月線，似乎好友想守呢個位，唔理A股插水，港股繼續反彈，恒指最多升152點，見23545高位，但未有進一步向上挑戰20日線，皆因A股彈唔起。北水連日流出，今早半日竟然錄得近125億元淨流入，半日成交額1152.67億元，似乎港股又唔算太差。 技術走勢方面，目前重新企穩5日線及10日線，能守於23250之上，再企穩100月線大約為23350，料可再挑戰20日線，亦為5周線所在，大約為23650至23700，不過過20日線亦為下降軌底部，料此水平阻力仍大。至於下方除上述兩個支持外，下一重要支持為23050至23150，此為期貨10月期結後成交密集區底部，如下破23050，則往下支持為22900/22800，上月低位，失守22800則繼續向下尋底。