【盤房來料】 美伊戰爭消息影響退減 焦點轉往重磅股業績(040526).docx

美伊戰爭消息影響退減 焦點轉往重磅股業績 上周五港股假期，而美股表現反覆，特朗普指美國對伊朗的軍事行動已結束，國際油價滑落，道指周五曾升336點，其後特朗普稱將上調歐盟汽車關稅，道指收市倒跌152點或0.31%，報收49499；標指及納指齊創即市及收市新高，標指曾升0.88%，收市仍漲升21點或0.29%，報收7230；納指一度升1.33%，收市升幅收窄至222點或0.89%，報收25114。蘋果業績理想，股價曾升5.8%，收市仍升3.2%，微軟及亞馬遜亦升超過1%。至於其他股份方面，CRWV最勁，守住110美元後，周五晚再升，又彈得返上去118至120美元，目前用110美元做防守，回補嘅貨若然有120至125美元又可以考慮食一食短炒貨先。GOOGL繼續向380至400美元目標出發。NVDA回落至200樓下，今晚睇下上唔上得返200美元，否則防守區將略為下移至190-195美元。TSM同NBIS都無去到一個理想嘅補貨位，但手上仲有一半貨留住，ALAB話咁快又上返200美元樓上，補到180同埋185元嘅貨，今晚又隨時可以食糊。ONDS順利上返10美元樓上，呢隻阿Man想留位等下先，雖然公司早輪做得太多收購，好多都涉及發行股票，短期嚟講無可避免地會出現一個攤薄效應，市場需要一啲時間去消化，但完成嘅收購中長線係會壯大間公司，對前景有利。AMNZ去到270美元企唔穩又返轉頭，271減咗三分一貨，暫時防守位推高去240-250美元。NQ就高處未算高，上周五我哋放緊假之際，NQ又創盤中同收市新高，今早繼續喺27900水平之上，今晚NQ個分水嶺喺27900，支持27800/27700/27600/27500，27500-27600有機會由前阻力變支持，至於上面阻力28000話晒都係另一個心理關口，話就話穿唔估頂，但呢個位又無話咁易可以企得穩，相信會係初步阻力。 目前市場焦點由美伊戰爭轉移至由戰爭引發對全球通脹加劇擔憂，但白宮顧問哈塞特直言，如果聯儲局或歐洲央行因擔心能源價格急升可能引發通脹而加息，將會係一個政策錯誤。不過達拉斯聯儲總裁洛根表示，鑑於前景不確定性，以及對通脹持續擔憂，聯儲局唔應發出下一次政策行動將係減息嘅訊號。而克利夫蘭聯儲總裁哈馬克則表示，鑑於經濟及通脹前景存在不確定性，反對聯儲局本周維持寬鬆傾向。美國10年期債息一度升3.23基點報4.4029厘；2年期債息曾漲3.33基點至3.9022厘，隨後雙雙倒跌。紐約期油一度急跌逾5%，低見每桶99.3美元，收市跌幅收窄至2.98%報101.94，今早於亞洲時段仍於100美元之上徘徊。 至於港股喺4月最後一個星期表現麻麻，上周四勞動節假期前，恒生指數抹去上一個交易日全數升幅，周四低開103點後，一度反彈至26072點後回復跌勢，最終跌335點至2776收市，按周則跌202點或0.77%，相繼失守5、10、20、50及100日平均線，只仍守住30日線及250日線。不過至夜期時段，卻反彈逾300點，再度逼近26000水平，而今早黑期於26200水平徘徊，對應期指即重返26100水平。由於特朗普指周一開始解救滯留霍爾木茲海峽船隻，海峽有望重啟，打擊油價回落，不過目前紐約期油仍高居企100美元水平之上，較美伊戰爭開打前仍高出五成。美伊戰爭開打已逾月，戰事消息對於股市影響似乎已陸續退減，加上美股已跌入業績期，市場將焦點轉往業績以及通脹回升嘅情況上。至於港股則於幾條移動平均線之間上落整固，但支持區似乎由之前25000至25500水平，上移至25600至26100水平，開始打造另一個支持區。今早恒指高開361點， 早段最多曾升549點，見26326，但仍未企好26300日線圖嘅頭肩頂頸線位，半日報收26216，升439點，北水缺席下，半日成交只有1076億元，未能做到價量齊升。暫時港股仍欠動力，上周四個交易日始終未能企穩26000關，但整體沽壓未算太顯著，而今明兩日北水休假，周三北水復市回歸前，暫時料港股仍處於上落市格局，下方250日線即約25450水平有一定支持，而上方日線保力加通道頂部約26600水平仍有阻力，而本周滙控(00005)將公布業績，料成為市場焦點，要睇下大笨象有冇本事帶領大市衝破26500近日高位再挑戰27000水平。