【盤房來料】 港股彈散淡友仍然控制大局(040626).docx

港股彈散淡友仍然控制大局 觀望中東局勢發展，美伊談判毫無進展，油價又重返高位，暫時紐約期油於95美元水平徘徊。而俗稱「褐皮書」嘅聯儲局地區經濟報告表示，美國近數周就業市場保持穩定，但受中東戰爭對能源價格影響，全國大部分地區通脹持續上升，已有聲音指為壓抑通脹，有加息需要，令債息回升。油價及債息回升拖累美股高位調整，道指周三低開86點後，跌幅持續擴大，並以全日最低點數位收市，跌逾600點；標指亦以緊貼全日低位收市；納指最多曾跌1.2%。美市收市，道指跌620點或1.21%，報50687；標指跌55點或0.74%，報7553；納指跌239點或0.89%，報26853。 Google母公司Alphabet將配股集資目標由兩日前公布800億美元上調至847.5億美元，股價收市反覆再跌0.8%，仍然守住350防守位，就暫時唔郁住。美股噚晚咁樣跌一跌，唔少股份都先行止賺，其中MRVL盤中上到335，見大市回就315先食咗269狗衝，擺返個280撈返，盤後中到，暫時擺返個285做stop，始終高追，都要有個止位，無理由畀自己贏變輸咁蝕底。至於CRWV食過返尋味，喺120撈返嘅貨，原價止咗先，見成個市來勢凶凶，盤後喺108中返個買盤，穿咗110，就要退守到102做防守。PL最終敗走，44.45元止蝕咗，唯有再睇定啲先算，呢兩日啲太空相關概念股，畀人質到體無完膚，等穩定返再算。至於DELL均價439上車嘅，真係急咗啲434止咗，見盤中落到408撈返，盤中見企唔到420，418落車，擺埋個408游水，暫時又接返。MU卒之喺1080落車先，NBIS同樣中咗250止賺，瞓醒見盤前穿過240又上返，240又補返注，望佢守得住240。其實MU係好想買返，等今日盤前開市再睇下個1050企唔企得穩，反正1080落咗車，喺1060之下撈得返，都叫游咗水。噚日跌市止賺咗啲升得急嘅股份嘅同時，又撈下啲估值仍叫合理嘅股份，AVAV呢隻無人機股，現價估值唔算高192左右買少少，上得返200應該仲有一波升浪。 至於NQ果然係企唔到個30800就再無衝上去，然後逐個支持位落去試，暫時真係去到30300左右有唔錯支持，今晚睇下係咪繼續守到呢個位。NQ今晚分水嶺30500，支持30400/30300，上方阻力30600/30700。 至於港股就真係蛋散嚟，噚日結束之前三個交易日升勢，恒指低開85點後持續走低，跌幅擴大至最多468點，收市跌405點，報數25569，連失多條移動平均線，僅剩10日線約25482尚未失守。成交維持暢旺達3229億，北水錄得淨流入38.5億元。不過至夜期時段，美股三大指數顯著回吐，夜期及ADR隨之而下，跌逾百點，夜期跌至25300水平，ADR亦低至25400水平，今早黑期於25400水平之下徘徊，結果今早開市後，承接外圍跌勢繼續向下，完全係外圍爆頂跟唔到，外圍調整又跌突，難怪唔少人對港股已死心，轉投美股捨棄港股。今早恒指低開167點或0.66%，早段反彈至25499，10日線企唔穩就插水向下，淡友前日受盡屈辱，噚日同今日反攻，恒指跌勢迅速擴大至逾300點，最多跌389點，低見25243點，連最後一道防線10日線(25445)亦告失守，半日貼近低位收市。恒指半場357點或1.39%，報25276。 今早恒指低開已遺下一個下跌裂口25499-25569，半日甚至已跌穿前日大陽燭底部25394，如跌穿25200，似乎上周一低位25174唔會係6月份低位，料再向下探底，再一次回試24700-24800上月底部，跌穿則往下回試3月低位，即24200-24500水平。至於反彈方面，仍然係幾條移動平均線為每一段阻力，分別為25450約10日線，25700-25750約250日及50日線交匯處，以及25800約20日線。除非大市喺一兩個交易日之內，收復呢幾條移動平均線，並企穩25800，否則港股維持弱勢，將繼續其尋底之旅。