【盤房來料】 港股重上廿日線企穩 惟成交未配合(040926).docx

港股重上廿日線企穩 惟成交未配合 聯儲局重磅級理事Christopher Waller發出偏鴿言論，美國債息回落，加上DELL公布業績後做好，支持美股周四顯著做好。道指高開247點後，升幅擴大至最多684點，高見53746，收市接近高位報數53686，升624點或1.18%；標指升81點或1.06%，報7747；納指升366點或1.4%，報26584。 重磅股表現突出，Tesla股價抽高5.4%，SpaceX更急升6.4%，時隔近兩個月市值重上2萬億美元；Meta推出AI模型Muse Spark 1.3，股價升3%，微軟升2.7%；Nvidia落實斥資129.3億美元收購AI初創Hugging Face，股價彈1.8%。高盛升3.3%，為升幅最大道指成份股；Cisco回吐0.8%，為表現最差道指成份股。Snowflake第二季盈利及經營收入均超乎預期並發布強勁的業績指引，股價漲16.6%。博通(Broadcom)公布季度業績後股價跌2.7%，公司對第四財季營收預期令投資者失望。至於阿Man噚晚就畀開市回一回嗰吓震散咗個短炒倉，幾隻短炒貨落晒車，家下個短炒倉已清空。DELL見開市上到500後，又企唔到，叻唔切喺495落車，結果盤中上到530，得個睇字，盤後落返520樓下，若然仲有貨喺手，可以用個500做防守，睇下子彈可唔可以再飛一會。至於MU開市又係950走唔切咁，暫時夜期上到965，有貨可以用940做防守持有，睇下去唔去返Range頂980-1000。DELL同MU叫做食住糊落車，但MRVL同CRWV就輸住走，開市見CRWV好似畀條10MA頂死，85企唔返，都無得到穿80，自行喺80打晒，結果擺低6元一股，若然照擺個79止蝕，唔使死得咁慘。MRVL同一命運，都未去到個止蝕位，200企定定，忍唔住原價喺203落車，炒咗個寂寞，盤後見股價上返210，除咗唏噓只有唏噓。阿Man之所以噚晚個短炒倉被KO，主要係擺脫唔到9月美股瓜多過菜嘅魔咒，但長線投資嗰部份，當然唔會動搖到阿Man半分。聯儲局嗰邊講到明要睇住個通脹數據嚟決定其後息率走向，下星期五公布嘅CPI係一道重要主菜，至於今晚嘅非農數據，可以話係前菜一道。暫時FOMC裡面意見不一，鷹鴿難料，既然方向未明，短炒倉清咗又唔係太可惜。美國10年期債息一度回落6.7個基點，報4.727厘；對息口較敏感嘅2年期債息降6.83個基點，至4.3007厘。美滙指數曾回落0.77%，報98.83，日圓連續兩天顯著上揚，抽升2.15%至155.3兌每美元。暫時債息略為回落，但以平均數嚟計，都仲係挨住高位，國際油價高居不下，通脹即使受控唔再升，但要回落似乎未有條件，即係就算唔加息住，今年內貨幣好難行返寬鬆政策。NQ一口氣抽返上去20MA樓上，今晚NQ分水嶺29550，支持29450/29350/29250-29200，阻力29650/29750/29850-29900。 至於港股昨日高開，恒生指數早段曾升226點，高見25538，可惜受制10日線及20日線匯聚區約25530調頭，盤中由升轉跌，最多跌150點，低見25160，收市跌97點，報收25213，連跌4個交易日，成交更縮水至1993億元。暫時大市仍然於幾條移動平均線之間穿梭，整個星期收市均未能企穩20日線，不過低位一直守於20周線之上。配合美股及亞太區股市回勇，今早港股終發力，一下就收復過去三日累跌371點跌幅。恒指高開302點，報25515，已為半日低位，好友發力將恒指升幅推高至逾500點，最多升578點，一度高見25791，惟升抵250日線25764，俗稱牛熊分界線未能企穩，半日升524點或2.08%，報25737。大市半日成交1345.84億元，北水淨流出58.12億元。以半日指數升逾500點嚟講，未能做到價量齊升。值得留意，過去三日大市成交由2387億元、2166億元，一路縮減至昨日1993.82億元，北水雖然連續幾日錄得淨流入，累計淨買入近34億元，但今早半日已錄得淨流出58.12億元，即係北水都趁今日反彈又短炒走人。而外資則未見積極入場，反映資金只係喺唔同板塊之間遊走，並無新錢湧入。 9月日本央行議息會議及美國聯儲局動向仍有懸念，港股估值受美元波動牽制，暫未有條件向上突破。值得留意重磅科技股再度轉弱，暫時科指已跌穿全部移動平均線，正考驗4500水平，此前為一個周線成交密集區，一旦失守4400，勢必再往4200水平即6月低位尋找支持。另一方面，之前持續強勢嘅內銀股，昨日亦見高位回落，如呢批強勢股亦無法支撐大市，港股後市定必再考驗50日線及25000重要關口，而此關不能再失，否則大市向下再回測24000機會大增。不過昨晚港股ADR及夜期均隨美債息回落，美股顯著上升而做好，夜期及黑期均已重返100日線之上，並重返25400水平，港股連跌四個交易日後料有反彈，首個反彈阻力仍為25500-25550，10日線及20日線匯聚區，企穩25550下一阻力為50周線約25687及250日線25761，目前25700-25800阻力仍大。暫時港股仍然困住喺25000至25800幾條移動平均線之間上落，仍未走出呢個區間。