【盤房來料】 港股急升後合理回調 保持升勢需守二萬六(050126).docx

港股急升後合理回調 保持升勢需守二萬六 美股上周五表現反覆，但尾市除納指微跌6點收市之外，道指跟標指保持升勢，道指升319點或0.66%，報收48382；標指則升12點或0.19%，報收6858。雖然周末傳嚟美國攻打委內瑞拉並捉拿其總統夫婦二人往美國審訊嘅消息，但今早亞洲時段，並未見道指期貨有太大反應。目前美股已累積可觀升幅，估值處於偏高水平，對負面消息較為敏感，但今次並未見因為呢個消息有太大反應，可見市場氣氛仍良好，投資者情緒偏向樂觀。暫時睇下歐洲開市後，納指有乜嘢反應，短線納指期貨(NQ)個好淡分水嶺喺25550，企唔穩25550會偏淡少少，有機會去25350至25400尋找支持，25350穿嘅話，小心可能急轉直下，下個大支持位係25000；至於上方首個阻力則為25650，25750-25800阻力更大。 亞洲市場方面，市場預期美國聯儲局將繼續減息，而其他央行大多已接近減息周期尾聲。此消彼長之下，利率差距有望收窄，有助限制美元上升空間，對亞洲股市構成利好。而人工智能(AI)公司正大幅擴大資本開支，同時喺功能與應用層面持續創新，將會帶動硬件及雲端供應商需求，直接利好亞洲地區科技製造商，所以阿Man上周五已表示，TSM今年可以睇高一線。國際數據公司idc話全球半導體生態正經歷前所未有記憶體晶片短缺，全球記憶體荒恐延續到2027，呢個正正係阿Man今年繼續好TSM嘅理由。 睇返港股呢邊，上周一恒指雖然高開低走，以陰燭跌183點收市，並在除夕日半日市繼續受制於多條移動平均線之下，但在周五2026年首個交易日，即高開高走，全日更急升707點至26338收市，按周升502點或2.01%，不僅重返多條移動平均線，更自11中以嚟，首日大幅收高於50日線之上，不過周五急升當日，全日成交額只有1408億元，略嫌未能配合升勢，今日北水假後回歸，仍要觀察本周恒指是否能繼續穩步向上，並再一次突破27000至27200大型蟹貨區，方能確認港股仍處於上落市，或真正再展開另一新升浪。半日恒指略為高開26361後，一度升至26445半日高位，可惜期指一開市已急回，高開低走格局下，即使半日A股做好，上證升1%，重返4000水平，亦無法帶動港股進一步向上。暫時期指喺26300-26350水平爭持，留意返下半場若然無法企穩26300水平，有機會回落至26250/26150尋找支持，一旦現貨再失守26200，則有機會考驗25950至26000，即50日線及100日線，大市要保持向上，此兩線本周不容再失。雖然目前恒指已升破日線保力加通道頂部，但要再展另一新升浪，需要進一步衝破周線保力加頂部，即約二萬七水平，令周線通道向上打開，並喺成交配合下，即平均每日成交額回復至2000億以上水平，方有條件展開新升浪，所以本周走勢極為重要。即使恒指於本周成功挑戰二萬七水平，但無法企穩後又再度回落至26200水平之下，重返日線保力加通道之內，即港股有機會仍處於上落市狀況，僅於日線保力加通道內上落，未有擺脫區間移動整固格局。短線支持為26200/26000；短線阻力為26800/27000。 個股方面，上周提過嘅敏實集團(00425)今日表現麻麻，半日逆市跌逾4%，但正好提供一個上車機會，只要唔穿30元，今日回調或者係急升後一個小調整，仍然喺收集範圍之內。另一方面，百度(09888)考慮分折崑崙芯喺香港主板上市，唔少券商都調高咗佢嘅目標價，券商估計崑崙芯2025年產生35億人仔收入，2026年崑崙芯收入更高達50-65億元人仔，估值介乎160億美元至230 億美元。百度持有崑崙芯59%，唔少券商已經將百度目標價調高，港股呢度大多睇佢可見170元-180元，而美股BIDU嘅目標價，大部份已上調至180美元或以上。咁不妨考慮下雙邊投注，港股呢邊嘅百度用138做防守，138-144元上車；BIDU就用140美元做防守，140-148美元元上車；港股嘅百度目標先睇160-165元，美股BIDU目標先睇170-175美元。