【盤房來料】 恒指回補完下跌裂口又遇阻(050326).docx

恒指回補完下跌裂口又遇阻 中東戰火未停止，但噚晚有消息指伊朗欲間接向美國提出和談，市場憧憬戰爭唔會持久，美股周三止跌後大反彈。市場預計中東戰事快結束，紐約期油抽升3.58%後倒跌1.72%。至於美股方面，道指高開88點後，升幅一度擴大至352點，高見48854，收市升238點或0.49%，報48739；標指升52點或0.78%，報6869；納指升238點或1.29%，報22807。俗稱「恐慌指數」的VIX波動指數曾回落13.44%至20.4。其實市場對中東戰事反應尚算溫和，尤其美股震盪短暫，一線股份回吐壓力唔太大，大部份都守到支持位；反而每一次震盪去到支持位附近，就提供咗上車機會。至於NQ估佢唔到，反彈力水唔錯，企咗分水嶺後，過晒啲即市阻力位，只不過仍受制條30日線，未能進一步突破，即管睇下今晚守唔守到24950-25050呢個位，呢度係5日線、10日線同20日線嘅匯聚區，守得到就再向上挑戰30日線25250，企穩先再諗25400-25450，即係50日線同100日線。今晚NQ分水嶺25050，支持24950/24850/24750-24700；上方阻力25200-25250；25400-25450。個股方面CoreWeave(CRWV)宣佈已與Perplexity達成一項多年期戰略合作協議，perplexity將通過 CoreWeave雲平台爲其推理工作負載提供支持。CRWV其實都係喺一個較大型嘅區間裏面運行，業務方面，市場需求就一定冇問題，但公司負債高，同有機會受到供應鏈嘅影響。股價喺70至100美元之間上落， 73-78美元買入，70美元做防守，上方97-100美元食吓糊，拎住呢個30美元嘅動區間炒上落。 中東戰火拖累亞洲股市急挫，昨日韓股暴瀉12%；泰國股市急跌8%；日經指數亦跌逾3%，港股亦受拖累低開，恒指低開298點見25470已為全日高位，盤中跌幅一度擴大至809點，低見24958，午後跌幅收窄，但仍要跌518點，報收25249，連跌三日。港股3月開局出師不利，恒指累跌1381點，昨日曾跌穿1月低位25630，更一度考驗250日線約25000水平，幸而最終仍守於250日線之上，於250日線見支持下，短線超賣下或見反彈。 市場避險情緒略為降溫，隔晚美股顯著反彈，夜期及ADR亦大幅高水，夜期重上25500水平，今早恒指裂口高開334點，升幅曾擴大至487點，曾高見25736，成功回補昨日所遺下嘅下跌裂口。可惜未能企穩25700水平，半日升幅削半有突，半日升212點或0.84%，報25462，接近噚日高位。國企指數升20點或0.23%，報8504；科指數升不足1點或0.01%，報4829，表現仍然疲弱。半日成交1641億元。今日反彈雖回補昨日下跌裂口，裂口頂部能否企穩25700水平甚為重要，而早市未能企穩25700，加上科指仍然疲弱，大市升幅削半，反彈力度只屬一半。雖然市場恐慌情緒略為消退，但短線要重返27000水平仍困難重重。不過恒指已自1月底高位28056累跌逾3000點，而250日線守住，中長線仍未扭轉牛市格局，現水平入場買入優質藍籌股，已為一個不錯切入點。尤其本來港股相對環球其他股市估值已相對便宜，目前估值更平絕全球，若然內地宏觀經濟能穩中向好，港股中長線價值預期已逐步浮現。如果唔擅長選股，又或者唔想逐隻個股分析，乾脆喺25000-25500水平收集盈富基金(02800)，預留400至500點作緩衝，大市只要唔跌穿24500，中線牛市嘅方向未改。只係短線而言，地緣政治局勢仍充滿不明朗因素，港股縱有反彈，上方仍要面對重重阻力，暫難隨即V彈急升，走勢料較為反覆。留意反彈阻力25700/26000，下方支持25300/25100/24950，250日線仍有不俗支持，但唔排除外圍一旦爆發更多利淡消息，250日線失守，則下一支持為24500-24600。