【盤房來料】 港股靠穩惟成交薄弱彈力不足(051026).docx

港股靠穩惟成交薄弱彈力不足 美國非農職位增幅少過預期，加上國際油價一度大幅回調，紓緩聯儲局本月再加息壓力，道指周五一度升456點，收市升幅收窄至250點或0.49%，報收51176；標指升56點或0.73%，報收7722；納指彈319點或1.19%，盤中破頂一度漲1.79%，收市報27190。聯儲局理事鮑曼稱毋須急於今年再加息。達拉斯聯儲總裁洛根估計，聯儲局需再加息0.5厘，但同時暗示之前債息上揚或有助經濟降溫。美國30年期債息曾瀉6.25基點報5.55厘，10年期債息急降8.79基點至5.1528厘，2年期債息滑落10.1基點至4.6913厘。美滙指數一度回落0.42%至101.67。日圓升0.72%。 美國聯邦航空管理局表示，經認定，部分波音737 Max飛機上出現的新軟件故障，並不構成飛行安全問題。受消息影響，波音股價收市升0.7%，盤中最強曾漲2.4%。Anthropic正計劃IPO，路透引述招股文件顯示，Anthropic警告稱，政府對該公司及其技術的態度，可能會對集團業務產生更廣泛影響，包括與商業客戶和合作夥伴關係。加息壓力有所緩解，美股上周五反彈，尤其係科技股表現唔錯，SpaceX急升7.4%，Tesla雖然第二季電動車付運量按年跌2.1%，但優於預期，股價抽高4.7%。Nvidia周五股價創盤中歷史新高，為四個月來首次，曾漲3%至237.88美元，收市仍升1.3%，市值已達5.7萬億美元，距離6萬億美元僅一步之遙。其他七雄就無咁威猛，GOOG暫時受制350，唔上唔落，阿Man唯有耐心再等。MSFT總算企穩500，繼續等佢慢慢上返去530/550。META守到720，平均價725嘅兩注貨，守到720就等等，之前急升咗，都要時間整固一下。至於其他短炒倉嘅股份，MU喺1100減咗半，1025撈嘅貨就只剩返一半。INTC同CRWV持有，但MRVL竟然擺喺280嘅沽盤，食咗一半218買嘅貨，若然今晚有250，就撈返。DELL繼續等，阿Man有信心，595唔係今年DELL嘅高位，等DELL 再上600-650。今晚NQ分水嶺31000，支持30900/30800/30700，阻力31100/31200/31300，企到31300又係例牌唔好估頂住。 至於上周港股反覆下跌，假期前未見有可突破，但至周五恒生指數卻以裂口低開，並跌至23865近三個月低位喘定，略為反彈至23972收市，但恒指仍遺下24099-24332巨型下跌裂口，全日跌640點，按周則再跌538點。恒指由6月26日低位22518反彈至8月4日高位26187開始調整，至上周五低位23865計算，已跌至回調黃金比0.618即23918方能喘定，雖然恒指收市企穩於23918之上收市，但至夜期時段，再回復跌勢，更一度跌穿23800水平，低見23732，收市報23831，已跌穿黃金比0.618，而今早黑期則於23800水平徘徊，估佢唔到恒指僅低開8點，報23963，不過一開波淡友又開工，跌幅一度擴大至最多136點，低見23835後，跌幅逐步收窄並一度倒升最多33點，高見24005後大市喺23900附近爭持。恒指半日收報23952點，跌20點或0.08%。北水缺席下，大市半日成交545.98億元，都預咗成交薄弱。 睇返牛熊證街貨分佈，以現價計算最近1000點區間計算，牛熊證街貨再度出現嚴重比例失衡，23400-23800牛證重貨區相等於超過3000張期指，今早開市先咗23850-23900呢一區嘅牛證，唔排除期指大戶趁北水缺席下，再借勢將指數向下壓至23400，剛好為6月至8月區間回調黃金比至0.764，亦為100月線所在。預期23400-23600呢個水平有一定支持。上周沽空比例高企，喺大市短線超賣下或見反彈，甚至乘勢挾沽空淡倉。不過港股仍以一浪低於一浪模式發展，本周即使見短暫超賣反彈，料上方阻力重重。大市反彈先要重返23950上周五成交密集區頂部，下一阻力為24100-24150，即日線保力加底部，及上周五下跌裂口底部24332阻力更大。除非恒指呢兩日迅速回補下跌裂口後企穩，並重上5日線即24400之上，反彈方有條件持續。至於後市發展，如港股一直無法重返24800企穩，則未能扭轉跌勢，反彈過後，跌勢將持續。