【盤房來料】 港股兩日累升近二千點惜成交未能全配合(051126).docx

港股兩日累升近二千點惜成交未能全配合 民主黨喺中期選舉中大勝，成功奪取國會兩院控制權，環球股市周三大幅波動，投資者最初擔心選舉結果將不利營商環境，尤其人工智能(AI)產業，但隨後市場認為侵侵以後嘅財政政策主張或受到更多掣肘，唔再可以肆無忌憚，帶動美國債息回落，令市場情緒轉趨樂觀。不過亞洲時段，美股道指期貨一度插幾百點，其後逐步收復失地。至美股正式開市，道指裂口高開623點後，升幅擴大至最多1705點，高見53492，標指一度揚升1.86%，納指曾勁彈2.67%。不過至收市，道指報53356，升1569點或3.03%，仍保持到一定升幅；標指收市升119點或1.58%，報7688；納指升幅削至364點或1.44%，報25736。亞洲股市走勢噚日同樣反覆，尤其係科技股較重嘅日韓股市，日經指數一度重挫4.84%，收市跌幅縮窄至0.62%；南韓KOSPI指數曾插水4.02%，收市倒升0.62%。 噚日個美股反覆到不得了，NQ來回過千點波幅，盤中NQ曾一度逼近29000，剛好條10MA附近，一個回馬槍就落去返28400水平收市，夜盤雖然更進一步跌至28200水平，走勢嚟講都幾曳下。至於重磅股方面，早兩日阿Man決定將個短炒倉嘅當炒股全數沽清，換入有盈利及估值已回歸理性嘅股份，做法完全正確。當中，AMZN股價抽高6.1%，阿Man喺243買入嘅短炒貨，見有10%進帳，喺268減返一半倉。至於MU喺噚日夜盤接嘅820半注，未開市見遲遲上唔返880，就喺863跟戰友們先落車，都叫執返5%，到開市MU幾乎係直插無水花，盤後更跌穿780個防守位，好彩已無再多手上車。MSFT係唯一今次調整浪中，無被止蝕嘅短炒股，股價噚日升咗6.7%，更再創52周高位，依家睇住條20日線530嚟做阼守止賺，奇蹟破頂都要慎防回吐。NVDA則下降3.2%，盤後穿咗200大關，不過190-210係阿Man嘅收集位，加上長倉有免本貨，今晚再決定加唔加注。META終於捱得返上嚟，之前625均價嘅貨喺633先落車，仲有一注609嘅貨，暫時持有。GOOG亦守住280阿Man個買入價，繼續Keep住睇股價有冇重返300大關。至於INTC係短炒倉內，唯一輸咗超過10%嘅股份，均價67有排未見家鄉，同樣有啲平貨喺手，必要時或者將啲短炒貨斬咗先。家下阿Man個短炒倉變得比較輕身，已經接近年底，持盈保泰，減少操作。雖然美股三大指數都大反彈，但AI股好多仲係尋緊底，資金流入再生能源、奢侈品及銀行股，甚至係消費股都見資金流入，之前阿Man喺233買入嘅MCD，打算擺長倉用嚟收息，唔覺唔已有接近兩成進帳。不過，美國共和黨嘅第一大金主馬斯克旗下嘅TSLA及SPCX就因為共和黨大敗已插水，兩股齊齊跌逾5%，阿Man短炒倉嘅SPCX，已逼近個防守位130。 美國10年期債息一度跌7.3個基點，至4.876厘，對息口較敏感嘅2年期債息下降8.95個基點，至4.5415厘。市場擔心美國政治陷入僵局，加上民主黨或加強盛管科技行業，可能削弱海外對美國資產需求，美滙指數曾跌0.75%至101.099。現貨金價重上4000美元，一度急彈3.57%，高見4070.42美元，今早升勢持續。侵侵可能都知美伊戰爭令油價高企，引發通脹威脅，係今次中期選舉大敗嘅致命傷，選舉落敗後表示唔會即時向伊朗發動攻擊，紐約期油回落8.29%，每桶收報88.12美元；布蘭特期油跌8.87%，收報94.62美元。 至於港股昨日先低後高，早段恒指低開74點後，受外圍股市急跌影響，一度跌140點至23385低位，但穩穩守住100個月線及10日線，隨住外圍跌幅收窄，加上A股午後愈升愈有，全日升393點，全日高位23919收市，升393點及1.67%，連升四個交易日。不過成交額僅2368億元，未見價量齊升，加上北水由前一日流得大額淨流入後，北水昨日錄得淨流出逾32億元，當中盈富基金(02800)淨流出59.79億元，可見北水都係坐唔定，短炒見利可圖即套利減磅。由於美股結束中期選舉後大幅反彈，帶動夜期繼續挾淡倉，一度高見24500水平，收市則略為收窄升幅至24400水平，但較日期再升500點，今早黑期亦於24400水平徘徊。今早大市裂口高開397點，報24316點，甫開市即重24000關，僅略為回落至24281即見好友發動攻勢，升幅一度擴大至829點，高見24749，一口氣收復50日線及100日線並企穩其上。噚日大市已成功突破短期下降軌，至於由今年1月延伸至今嘅大型下降軌頂則位於25300-25400，能否進一步突破，阿Man拭目以待。畢竟24800-25000都係一個重炮阻力區，加上短線極度超買，或者要喺高位整固一下，好友先再發動攻勢。 今日開市未有如期回補裂口，目前仍遺下一個逾300點裂口，如稍後略回補部份裂口，料首個支持為50及100日線即24450-24550。24450守穩，本月或再有高位。不過短線累計升幅已逾千點，加上短線超買嚴重，即使午後再出現再挾淡情況，估計24800阻力難以即日再突破企穩。不過目前恒指已確切升穿50日線及100日線，而今早愈300點上升裂口亦未見有回補跡象，如裂口於三個交易日內不完全回補，或僅回補部份至24100-24200水平，再重返50及100日線即24450企穩，港股可望擺脫今年長期向下劣勢，但能否再向上升破28000水平擴大年波幅，則要待升穿26000方能確認。相反，如三日內完全回補今日上升裂口，再失50及100日線，及跌破24350及24050，則回踩20日線即23700機會仍大。