【盤房來料】 美股再破頂帶動港股挑戰二萬七(060126).docx

美股再破頂帶動港股挑戰二萬七 噚晚個美股相當精彩，雖然納指早段落後一大截，但個道指一鼓作氣，高開93點後，升勢持續擴大，最多升827點，更創49209歷史新高，收市升幅收窄至594點，但亦創下收市歷史新高，報收48977，最後連個納指都畀佢扯埋上去。不過噚日阿Man講咗納期(NQ)個初步阻力喺25650，而25750-25800阻力更大，結果個NQ去到25700左右就行人止步，但25400有確係有支持，上得返25550，表現又唔係太差，雖然落後個道指，但總算守得住條20日線、50日線，係畀條10日線擋住咁，只要企埋25650，應該可以做返好啲。今日個NQ繼續用個25550做個分水嶺，企得到就睇個25650企唔企得返，企埋25700，就睇高一線。至於下面都係先用個26450-26500嚟做防守位，守到得就唔好睇淡喇。個股方面，噚日提過嘅TSM再上一層樓，盤後升至328美元，逼近前高位。今日想同大家介紹返一隻可以中線吸納嘅股份TEM，短炒就先睇68-70美元有冇阻力，防守位用個59-61美元，中線以基本面嚟睇，見返75-80元問題唔大。至於之前提過嘅RKLB，有望炒上八字頭，回調見70-75美元搵個位上車，博SpaceX以高估值上市，RKLB順勢炒上去。 睇返港股呢邊，上周五急升完，噚日喺26300-26400爭持，無再失26200，夜晚個夜期落到去第一個支持區26250，就跟返個美股上返去，加上A股亦做好，上證已升破前頂，今早恒指高開26502後扶搖直上，半日最高升至26858，進入咗第一個阻力區26800，半日報收26815仲企埋個26800。下半場睇住個26700守唔守到，因為今早高開26502，只係見26498低位就再發力上，其實遺下咗一個幾十點上升裂口，26445至26498，若然今日下半場守到個26700，個市可以再推高見埋27000。一旦失守返26700，咁個市有機會回補個上升裂口，去返26400附近搵支持，26400守到，企得返個26500，港股都只係短線回一回氣，後市仍然係睇再上。相反，下半場個指數再拉升去27000後，剛才KO埋最後一個重熊區，27000企唔穩，咁短線回調壓力會增加，畢竟由上周低位開局25600-25700水平計，升到去27000，都過千點升幅，短線做個小回調都合理。回調支持先睇26700，下一步係26400-26500。目前日線保力加通道頂部，已向上打開並上移至26500水平，回調唔入返通道內，繼續貼住條頂線行，咁向上挑戰周線保力加頂部，即係大約27100應該無乜懸念。個股方面，留意返隻舜宇光學(02382)，純睇圖表今日走勢跟大市背道而馳，其實幾樣衰，但公司正考慮分拆其車載相關光學業務，並在聯交所主板獨立上市。分拆上市嘅業務包括相機鏡頭、相機模組、光學雷達元件及產品等，並佔舜宇2025年上半年收入約17%。分拆消息有機會成為股價催化劑，加上呢個板塊都好耐無乜炒過，舜宇目前係接近半年低位徘徊，63至65元應該有一定防守力，就係貪佢個防守位近近地，65至67元收集，博佢再落鑊，炒返上去突破70元企穩，分拆一旦落實，有機會再度被重評估值，股價見返80元應該問題唔大。