中東局勢未明朗 股市表現仍反覆
中東石油供應憂慮持續，據報特朗普為美伊戰爭持續至少100日作準備，加上美國債息連升4日，美股周四受壓，道指低開212點後，跌幅擴大至最多1162點，最低報47577，收市報47954點，跌784點或1.61%；標指跟納指盤中曾跌逾1%， 收市幅收窄至38點或0.56%，報6830；納指收市跌58點或0.26%，報22748。睇返美股暫時對美伊戰爭反應又唔算好大，甚至可以話無乜恐慌情緒，即使軟件股喺2月開始被洗倉，加埋中東局勢持續惡化下，2月個人投資者流入美股金額，反而係自2021年以嚟第五多，可見市場對美股後市仍然信心滿滿。至於阿Man就咁睇，以為美國攻打伊朗可以速戰速決，點知依家已落實話要打多幾個星期，噚晚仲話侵侵已為呢場使持續打多過100日做準備，即係中東戢局嘅不明朗因素，短期仍會持續影響資本市場表現。
個股方面，暫時阿Man啲心水股都叫守到支持位，噚日見美銀有份報告，重新啟動對 Affirm(AFRM)建議，目標價82美元，相對噚晚收市價52.5美元計，睇落現價好似好吸引，潛在升幅逾五成。美銀認為AFRM係BNPL(Buy Now Pay Later，先買後付)領導者，目前正強化其市場地位。Affirm 受惠於持續GMV(商品交易總額)增長、紀律嚴明的核保標準，以及分銷渠道的持續擴張，包括其早期信用卡產品已展現初步成效，並與 Amazon及 Shopify等平台的策略性合作。雖然公司生意幾唔錯，但係股價就因為市場上升緊嘅信貸風險而大幅折讓，加上中東戰事下，息口走勢又變得唔太明朗，所以估值係咁跌。依家呢啲位，估值又變得幾吸引，48至53美元買，用返個40-43美元做防守，博下上返60都唔錯，暫唔睇到美銀目標82咁遠。至於NQ今晚個好淡分水嶺仍然係25050，首個支持位24950，重要支持24800，上方阻力25200-25250，25350-25400重要阻力。
早已預期本周喺中東局勢仍未明朗下，環球股市將繼續動盪，港股昨日高開334點，升幅一度擴大至487點，曾見25736，完全回補周三所遺下嘅下跌裂口25470-25727，可惜回補完裂口後，大市隨即掉頭，中午收市升幅已削逾半，午後更一度倒跌12點，低見25236，收市保住71點升幅，報收25321。但國指及科指分別跌32點及33點，分別報收8451及4796。雖然有消息指伊朗有意跟美國談判，但其後又有消息指特朗普已為伊朗戰爭或持續逾100日作準備，令美股昨晚再受壓，道指低開低走，一度跌逾千點，標指跟納指曾跌逾1%，不過尾市標指跟納指收復大部份失地。港股夜期時段曾受美股拖累再度考驗25000大關，ADR跌穿25300水平，今早黑期於25200水平附近徘徊。不過今早恒生指數高開37點，雖然曾轉跌53點見25267，但亞太區股市回穩，港股亦反彈。恒指半日升468點或1.85%，報25789，成功企返喺周三個下跌裂口頂；國企指數升187點或2.21%，報8638；科指升177點或3.69%，報4973。成交1412億元，周末前夕，成交縮少可以接受，但睇返個升幅，咁嘅成交當然唔多配合升勢。。
油價暫時未有進一步上升，市場對掉頭加息憂慮略為降溫，但一旦美伊戰爭持續，油價高企最終亦會拉高通脹，拖慢央行減息步伐，對股市屬利淡。港股後市仍有機會考驗250日線即25000水平，甚至借勢跌穿25000往下考驗24800/24600水平，順勢回收牛證重貨，亦借此完成本月波幅。不過於牛市中略為跌穿250日線經常發生，即使恒指跌穿25000，但只要於幾個交易日內收復失地，並開始築底，港股中線牛市格局未改，而處於牛市二期之中，偶爾考驗250日線，反而係低吸優質股機會。
Administrator
2026年3月6日