【盤房來料】 港股重返二萬六 暫修復全部平均線(060526).docx

港股重返二萬六 暫修復全部平均線 美伊大致維持停火協議，紓緩市場緊張情緒，美股周二造好，道指高開95點後，最多反彈423點，高見49365；標指跟納指齊破頂，收市亦同創新高。美市收市，道指升356點或0.73%，報49298；標指升58點或0.81%，報7259；納指升258點或1.03%，報25326；比特幣升2.5%，至81746美元；現貨金價一度反彈1.4%，今早進一步升至4600美元水平。國際油價大幅回吐，紐約期油挫3.9%，每桶收報102.27美元，今早於亞洲時段進一步回落至接近100美元水平。重磅股中，Alphabet計劃發行其歷來最大筆歐元債券，規模至少90億歐元，亦擬發行介乎30億至50億加元債券，股價收市升1.4%；蘋果反彈2.7%，據報正在與英特爾(Intel)及三星洽談晶片合作，英特爾股價急升12.9%，至108.15美元創歷史新高。呢一次係完美地錯過咗Intel嘅升浪，但無參與過都無辦法，MU又係衰孤寒同畏高，同樣錯過，盤後竟然再升至679高位，有貨嘅反而可以減返部份套利，逼近700嘅MU，確實唔平。暫時INTC及MU有貨嘅睇返啲止賺位，前者用95-100，後者600-620。講到最無癮嘅一定係NFLX，連90都失守呢下係差啲，但嚟到呢啲位，其實估值都算平，今晚守到85美元或者加多注，長線都有信心上返三位數。ALAB仲有一半貨持有，股價盤後再上到220之上，防守位可以推高少少去200。CRWV穩步上揚，防守位推高至120；NBIS同TSM，後者就係去到400左右要抖抖，總之前者防守位150，後者防守位380，守住就擺埋一邊先。NQ又創新高，話咗上面都唔好估頂住，以為28000邊有話企就企，偏偏噚晚個分水嶺27800企好又再gogogo，今早亞洲時段愈升愈有，最高見28422，暫時回吐至28300水平。今晚NQ分水嶺28250，支持28150/28050/27950/27850，阻力28350/28450/28550-28600，又係嗰句，估頂無乜意思，睇住啲支持位似乎更有用。 港股昨日反覆，恒生指數低開150點後，跌幅一度擴大至405點，低見25690，不僅再失二萬六關，同時跌穿5、10、20及50日線，午後跌幅逐步收窄，最終報收25898，跌幅收窄至197點，50日線約25800失而復得。不過北水缺席下成交繼續縮減，只有1222億元，交投淡靜。不過至夜期時段，美伊大致維持停火協議，緩解市場緊張情緒，美股周二做好，三大指數上升，標指跟納指繼續破頂。受美股回升刺激，夜期及ADR略為回升，今早黑期反彈逾百點，重上25900水平之上。今早恒指高開131點或0.5%，報26029後，升幅一度全數蒸發，更倒跌20點，低見25877點後回穩，條20日線失而復得又守得住，加上A股長假期後回升，愈戰愈勇，帶動恒指重拾升軌，上半場最多311點，高見26210點，半日收報26104，升205點或0.79%。半日企住條100日線附近，暫時已成功修復全部移動平均線。只要外圍股市生生性性，短線港股仍有條件向上挑戰頭肩頂頸線位26300，企得穩，或者有望再挑戰26500，但要突破向上，真係要QQ(00700)扭轉弱勢先得，呢個月QQ會公布季績，睇下到時有無乜嘢可以扭轉目前大家對佢嘅睇法。至於噚日提到大笨象(00005)135元會有支持，結果影都無，更遑論向下去131補裂口。其實大笨象業績又唔算差，甩咗少少轆係因為中東業務撥備多咗啲，派息保持，由今年起至2028年，管理層有信心做到股本回報率17%，都算有交代。