【盤房來料】 港股技術走勢改善 有望逐步築底回升(060726).docx

港股技術走勢改善 有望逐步築底回升 上周五美國假期，基本上美股都係要等今晚或者歐洲開咗市，盤前再睇睇，暫時阿Man個短炒倉都幾空虛，但多留現金，進可攻，退可守，幾時都係有錢喺手，買貨唔使急，錯過機會總好過開錯盤，反正上半年美股利潤短炒同長倉都有唔錯表現，踏入第三季再從新嚟過亦無壞。 上星期啲內存半導體股大幅波動，喺度同大家分享下瑞銀呢個板塊嘅報告，報告嘅主調仍然係睇好相關股份，主要係相信喺長期協議LTA談判進行同時，生產商仍有一定議價能力。新版協議納入更固定的數量和定價條款。美光(MU)嘅SCA設有價格“下限”及“上限”，而韓國廠商則將60-70%五年期合同量以固定定價鎖定，並附加浮動部分。三星預計喺第三季完成與多家大客戶修訂LTA，重點係DDR5，目標將50-70%量納入LTA。SK海力士嘅談判則聚焦超大規模客戶嘅DDR5及NAND。報告微幅上調HBM需求預測，2026年增至331億Gb，同比增長90%，2027年增至587億Gb，同比增長77%），對應輝達(NVDA)AI GPU等效採購量2026年850萬顆、2027年1,100萬顆。Meta可能向外部出售算力報道，喺上週一度衝擊內存股，但預計為舊資產貨幣化，應該唔影響HBM採購。內存股自6月高位平均回調17%，但基本面依然強勁，2027年行業自由現金流有望接近1.2萬億美元，報告指將推動股東回報提升。維持對三星(目標價55萬韓元)、SK海力士(目標價320萬韓元)、美光(目標價1,625美元)、鎧俠(13.2萬日元)及南亞科技(495新台幣)積極評級。呢份報告都算係對內存股派咗一粒定心丸，今晩再觀察一下MU走勢，要唔要搵返個位上車，暫時支持位喺900至950美元，一旦失守就要睇返個850-880美元。至於上方阻力暫為1080-1100美元。至於NQ今晚分水嶺29800，支持29700/29600/29500/29400，阻力29900/30000/30100/30200 上周五美股休假，當晚夜期幾乎無咗心跳，今早黑期則稍稍為回落23300水平之下，又再逼近返條10日線。港股上周四假期後，七月開局連升兩個交易日，周五一度升至23516水平遇阻，最終以23350收市，升295點，按周計升679點，結束連跌七星期不斷向下尋底之勢。不過以港股從5月高位26844跌至6月低位22518，累跌逾4000點計，目前反彈力度實在微弱，反映市場仍未完全恢復信心。 恒生指數指今早高開54點，報23404，其後一度倒跌最多120點，低見23229，守住條10日線約23212，好友隨即發動攻勢，大市迅速收復失地，並回升最多336點，高見23686後回順。恒指半日升192點或0.83%，報23542。大市半日成交1862.37億元，北水淨流入100.59億元，北水流入積極咗。 睇返上周恒生指數成功升破5日及10日線，並連續三日造出higher high及higher low，技術走勢開始逐步改善，唔排除大市開始喺市場接近絕望中築底。當然，恒指能否成功築底或已經見底尚有待確認；首先短期內切忌又再跌穿5日及10日線，盤中回踩無問題，只要收盤唔跌穿就可以。當然最好能夠升穿20日線即23862，令技術走勢進一步改善。本周如外圍及內地股市未見太顯著調整，企穩則進一步向上挑戰20日線即23950水平，甚至進一步挑戰30日線約24350-24400，至於24600-24650呢條10周線，阿Man暫時未有咁大想頭住。目前港股仍弱不禁風，反彈之路並不平坦，留意本周仍有機會先回踩5日線即23170及10日線23212支持，5日線不容再失，否則下方支持為23000心理關口，打後就係22800及22600，再失上周低位，港股則難言見底。