【盤房來料】 港股調整下方廿日線重要支持(060826).docx

港股調整下方廿日線重要支持 市場憧憬中東和談取得突破，加上美企業績普遍理想，美股周三個別發展，道指又再創即市及收市歷史新高，高開180點後，升幅擴大至最多658點，高見54744，收市道指仍升263點或0.49%，報54349；標指回吐12點或0.17%，報7723；納指跌221點或0.83%，報26363。重磅股個別發展，NVDA股價收市升3.4%，終於畀阿Man等到佢上返220美元，暫時短炒貨未落車，守到208-210，又想貪心小小。MU撈返一半868嘅短炒貨，繼續炒住上落先，博到上去920，但暫時整個板塊都係反覆，臨瞓前擺咗個918止賺，唔好搵自己笨，有50蚊都袋袋平安先。NBIS追返221嘅半注，因為高追都怕死，為咗唔輸睇住條50MA，企唔到先落車223。至於DELL追返452嘅貨，本來想等佢企上500，但穩陣計又係擺定480止賺先，瞓醒一望又KO埋。INTC未上車，等三點後歐洲開市再睇下點。不過MU、NBIS同埋DELL，今朝見全數出清，夜盤又擺定買盤，結果MU中返870，DELL中咗463，MU睇住850做防守；DELL防守位450，至於NBIS擺咗個212暫時未上到車，上到車就用205做防守。另外噚晚心血來潮361衝咗少少GOOG，用個340做防守。 華爾街大淡友Michael Buryy就表示，雖然標指創新高可能吸引新資金進入市場，但仍相信美股或已接近一個重大頂部，甚至可能出現類似1987年崩盤式暴跌情況。當然暫時點睇，呢位仁兄講嘅1987年股災都未似會短期內發生，加上佢除咗2008年勁贏一鋪之後，呢十幾年都係戰績麻麻，但總之短炒呢期都係睇返緊啲，事關都未可以好肯定呢堆股份係見底，抑或只係彈完又散過。好似SPCX咁，業績都叫好過預期，市場一樣唔同佢客氣，股價又插水超過一成，單日市值唔見2250億美元，都咪話唔恐怖。其實家下華爾街意見都幾分歧，Yardeni Research創辦人亞德尼於彭博訪問就話半導體股較市場存有巨大折讓，咁望返呢個板塊嘅股份，好多PE都已經落返去單位數，又真係唔算貴。NQ又真係Easy mode，噚晚開市又係彈到30000邊回頭，穿埋個分水嶺29800一直插水，去到條50MA先叫有啲支持。暫時夜期喺29500左右徘徊，今晚個分水嶺係29500，支持29400/29300/29200，上方阻力29600/29700-29800，總之20MA喺28960，呢條線咪鬼再穿，上面都係咁，企得穩30000，先有資格再上望30100/30200/30400。 港股於二萬六關附近停滯不前，恒指昨日高開38點，雖然一度升25973高位，可惜無法重返26000之上，盤中更倒跌退守至接近250日線附近，低位25729見支持反彈，最終收報25915，升62點，但至夜期時段明顯轉弱。夜期跌穿25700，失守250日線，今早黑期於25650附近徘徊。恒指低開248點，報25667，一開波條250日線即牛熊線已失守，大市進一步跌穿10日25623，半日最多跌526點，低見25389點，其後略為回升至25400水平之上，中午收報25463，跌452點或1.75%。中國傳將境外保單收益徵稅20%，友邦(01299)半日急跌8.7%，報70.95元，為半日最弱勢藍籌，都算無陰功。大笨象(00005)落咗嚟補裂口，跌穿20日線，半日報收158.4元。加埋啲重磅科技股插水，個市出現調整一啲都唔意外。 阿Man都講咗幾日，其實大市自6月低位反彈至今，恒指累計升幅已逾3000點，加上大市升抵25000水平後，一直未見價量齊升，由25000升至26000水平，更顯得吃力，挾淡倉意味較濃，即使大市開始回調整固，應不感意外。短線跌穿250日線、10日線及10月線約25600水平後，若然呢兩日都無法重返25700，短線往下方往25100至25200，即20日線及100日線水平尋找支持。一旦跌穿此兩線及25000心理關後，則20周線24715及50日線24613為最重要防線，失守港股不僅要進行更深度調整，甚至有機會展開另一新跌浪。至於上方反彈阻力為5日線約25900及26000心理關口，無法重上26000水平企穩，可以確定反彈浪正式結束，大市先於25000-26000水平進行整固，抑或進行深度調整甚至展開新跌浪，則仍要觀察。