港股整固幾日靜待突破
6月6日，大致多雲，間中有驟雨，局部地區有雷暴。今晚美國將公布5月份就業數據，美股隔晚高位整固，道指反覆做好，不過標指及納指破頂後，則見回吐，但沽壓有限，僅稍稍倒跌。美市收市，道指進賬78點或0.2%，報38886點；標指跌1點0.02%，報5352點；納指跌14點或0.09%，報17173點，Nvidia今晚盤後一拆十，股價隔晚曾回吐3.4%，但收市跌幅收窄至1.1%；英特爾倒跌1.2%，為跌幅最大道指成份股。亞馬遜四連升，隔晚再升2%；Meta回吐0.3%。Lululemon調高全年盈利預測並加碼回購股份，股價曾升4.8%。
標指於周三創出今年第25次收市新高，高盛環球市場董事總經理Scott Rubner估計，7月初將有大量被動式股票配置資金湧入股市，估計達260億美元，加上散戶往往於7月季節性因素入市，將令股市喺初夏保持升勢。佢同時引述數據稱，自1928年以來，7月頭15日係股市全年表現最佳嘅兩星期，而標指過去9年嘅7月份皆錄得升幅，平均回報達3.7%。其實一向有話，五窮六絕七翻身，對於美股嚟講，五窮六絕適用，七唔需要翻身咪再創新高囉。其實只要資金持續充裕，其實美股都係易升難跌，由三年前開始發表美股爆煲論嘅，真係唔知等到何年何月，美股先得嚟爆煲。
市場仍然炒緊美國今年有條件減息一次，最快係第三季尾，不過聯儲局一向通住通脹數據做人，除非美國嘅經濟情況急速惡化，否則短期未見有減息逼切性，第四季美國總統大選，當作贈興，咪可能減返一次叫做少少嘢。美國10年期債息最多漲4.46個基點，至4.3201厘，對息口較敏感嘅2年期債息曾升2.89個基點，至4.7512厘，不過市場仍憧憬減息下，兩者其後都輕微回跌至於美滙指數反覆，一度回升0.1%，至104.374，亦曾下跌0.21%，至104.05，其實都只係喺104水平附近上上落落。
至於港股過去四日，一直困於18300至18700水平之內上落，今晚星期五而下周一係端午節假期，加上今日周權結算，似乎今日將會係好友淡友決勝負嘅重要一日。雖然隔晚反映中概股表現嘅金龍指數跌0.13%，不過港股ADR比例指數卻升79點收18556點，今早黑期亦重返18500樓上，相信係反映美團(03690)優於預期嘅業績。預期今日恒指高開，未能突破18300至18700區間，呢個星期會係繼3月最後一星期，不足400點波幅後，只有400幾點波幅嘅一個星期，為今年以嚟第二窄波幅嘅一周。周線圖則呈現「身懷六甲」，屬整固格局，下周破本周底即18283則繼續向下尋找短期低位，破頂則完成調整，再上試前高。
利益申報 : 筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。 免責聲明 : 本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。 版權聲明: 本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。