【盤房來料】 港股未有方向 廿日線得而復失(070926).docx

港股未有方向 廿日線得而復失 上周五美國公布8月非農就業職位增長強於預期，掉期市場顯示，交易員押注聯儲局本月加息幅度由之前0.13厘，輕微增加至0.16厘，並估計全年累計加息0.38厘。不過卻有聯儲局官員放鴿，紐約聯儲銀行總裁John Williams接受CNBC訪問時表示，長期國庫債券孳息上升並非憂慮通脹，只係反映經濟強勁，而借貸成本上升不一定影響央行貨幣政策。而有投票權嘅聯儲局理事Christopher Waller甚至明確表示，喺9月中FOMC會議應維持利率不變。FOMC本月加息與否仍充滿變數，取決於本周公布嘅重量級通脹數據。美國8月非農職位增長超估算，債息抽高，市場料聯儲局本月加息機會逾半，道指周五曾跌396點，收市仍跌271點，標指挫0.38%，納指回落0.29%。雖然美股三大指數回落，但唔少重磅科技股未見隨大市回軟，反而表現硬淨。 上周五阿Man完全無睇過啲美股，因為過咗馬交食好西，翌日瞓醒望一望，上周四清咗個短炒倉嘅股份，再升多咗去接近阿Man本來預算嘅目標價。CRWV上到89，仲有貨嘅，可以將防守位推高去85，再睇下明日假期完咗返嚟，上唔上到去挑戰20日線、100日線及250日線，即91至98。DELL企穩500，當然阿Man又係兩袖清風，有貨可以將防守位推高至490，5MA守到可以keep住先。MRVL正路就可以推止賺去210，上面225企得穩又可以再睇高少少。MU真係走得早，本來預計阻力喺980-1000，守到920其實可以等等，結果周五晚上到1016，閣下有貨可以推止賺去950-960，又係用條5MA嚟決定去留。NVDA短炒貨雖然無博到業績，但長線持有嘅貨打死都唔走，美國理財網站 The Motley Fool 分析師德魯里預估，NVDA股價在不到一年內有機會再翻倍，帶動市值一舉衝上10萬億美元，並指出目前現價市盈率不足30倍，預測市盈率更不足20倍，估值相對偏低、具備強勁補漲空間。今晚美股假期，本周將公布重量級通脹數據CPI同PPI，下周等埋FOMC個議息結果，再睇下點樣部署個短炒倉。NQ今晚仲可以炒到香港時間凌晨一點，但預計假期都無乜動靜，暫時NQ分水嶺喺29550，上下估計都係200點之內上落。 上周港股先跌後回升，雖然上週三恒生指數一度跌穿100日線25200水平，更逼近25000大關，亦即考驗目前正上移至25000水平嘅50日線，但當日最終收市重返25300水平，50日線及100日線均能守住。直至星期五，恒生指數回升逾400點，一口氣收復5日、10日及20日線，盤中一度高見25790，盤中更曾經重越250日線，收市報25650，250日線則得而復失。不過今早個港股又走晒樣，250日線阻力打唔穿，仲要一嘢打爆返條10日線及20日線，恒指半日跌248點或0.97%，報25402，叫做險守條支持力度有限嘅5日線。半日成交額1229.75億元，阿Man上周都多次強調，欠缺成交支持嘅升市，唔好太過樂觀。 暫時恒生指數仍未走出25000至26000呢個上落區間，本周恒生指數如果能夠成功企穩20日線之上，先有機會再向上挑戰250日線。相反，恒生指數如果重返25500水平之下，則再度考驗100日線及50日線。由於港股成交始終未能配合，仍欠缺動力突破向上，港股要真正回復強勢，升市要平均成交最少要上2800億至3000億。暫時從資金流方面觀察，未見有新資金流入。暫時大市仍未見明顯方向，日線保力加通道收窄，等待突破，短線支持25200-25220，最大支持為25000。短線阻力為25750-25800，下一阻力為25950-26000，最大阻力為26200。港股資金仍以流入估值較低嘅傳統股為主，重磅科技股走勢相對落後，唔少龍頭科技股現價已具備一定防守性，向下空間未必太大，令指數於25000水平有相對較穩固防守力。不過業績期過後，暫時大市欠缺明顯催化劑，加上未見新資金流入，令大市向上突破26000-26200動力不足，除非FOMC議息時，利率政策帶來衝擊，否則港股似乎維持於25000-26000區間整固機會較大。