【盤房來料】 港股急升急回 暫未擺脫上落市格局(080126).docx

港股急升急回 暫未擺脫上落市格局 港股噚日開始做回調，卒之一個半交易日，就抺走咗前個交易日三分之二嘅升幅，當全世界都睇住個27000-27200，佢喺26800附近就掉頭，噚日一如阿Man所料，落咗去補裂口，雖然恒指收市勉強企舨個裂口底，但當條5日線上到去已經上咗去26400附近，呢個位喺夜期噚晚失守咗，今日就低開再直接落去試埋條10日線約26070，做咗個半日低位26054。暫時反彈咗100點左右，一旦下半場連個26250都上唔返，即係周一個低位，咁調整有機會繼續，進一步考驗幾條周線嘅匯聚區，同埋50日線(26007)及100日線(25983)正正係26000左右，呢啲位不容有失，最後防線當然係20日線，大約係25800，穿返呢個位，成個勢又轉返弱。港股搞嚟搞去都係突破唔到周線保力加頂部，走唔出區間上落個格局。噚日有提到如果做回調，恒指失埋條頸線，已初步推算個市有機會係做反彈浪嘅一頂低一頂，今日再失埋26300個支持位，順勢考驗10日線，連呢條線都失守嘅話，需要考驗26000/25800嘅支持，個市可以肯定係繼續行range。事實上，美國總統特朗普，早前對委內瑞拉展開軍事行動，表面未對環球股市帶來重大影響，但打開此潘朶拉盒子，預料今年地緣政治局勢更趨緊張，市況亦偏向更為波動，而貴金屬價格高企，可見資金早已為動盪局勢作部署。估計今日下半場，去到25950-26000，應該有啲支持，若然反彈，都係睇返26150-26200會唔會變阻力。今晚夜期都係睇反彈做淡倉，反彈企唔返條10日線即26100，個市都係瓜多個菜，下方好大機會考驗20日線，若25800水平，順手KO埋25850-25900嘅重牛區。 個股方面，噚日叫留意嘅中國光大環境(00257)正處於收集區，今日見到美銀出咗份報告，上調目標價至6.2元，原因係公司有條件增加派息，阿Man就主要等區佢回A上市，H股估值有上調空間。今日就睇緊隻殘咗大半年嘅股份泡泡瑪特(09992)，雖然消費股暫時表現麻麻，但泡泡瑪特自去年高位340元水平回落，至早前低位大約185元水平，累計跌幅已達45%。當然以市值計算，泡泡瑪特依家都唔算平，不過公司計劃將其核心IP，LABUBU打造成一個長青的IP，已計劃構建LABUBU主題公園，而美國市場銷售表現亦超出市場預期，北美市場仍可釋放長期潛力，而喺中國及亞洲嘅地位將成為集團2026年增長基石。阿Man喺度諗，泡泡瑪特若然要大搞主題公園，股價經過半年收集期，喺190至240元之間進行收集，今年有冇機會炒返一段上去，乘勢批股集資去拓展主題公園業務。現價收集，用個180至185元做防守，股價企得返200元，先睇返個收集區頂部220元為首個阻力，中線博佢上返240-280元都唔算好過份。 至於美股呢，道指跟標指連番創新高後，噚晚卒之識回一回，NQ個25950果然係大阻力，嗰個range頂開淡倉，贏面都高，嚟到亞洲時段嘅中午，連個25700分水嶺都穿埋，咁要睇返條20日線同50日線嘅支持力度，大約係25500-25550呢一個位。暫時NQ仍然喺25400至26000呢個range裡面。個股方面，噚日提過ASTS波幅勁，估佢唔到一晚跌咗一成，本來打算90元左右上車，誰知佢一下打爆咗個85元，未上車就再等等，80至82美元上車，75至78美元做防守，穿埋75嘅話，下個支持位喺70-72美元。呢兩日反而睇漏咗隻FLY，一樣係太空概念，跟ASTS相比，FLY五日急升咗兩成，想搵位上車，似乎要等返個22至25美元。溫馨提示，呢啲二三線股，單日波動幾大，預咗食定暈浪丸先好上車。