【盤房來料】 港股急升後回調 稍後或靠習特會消息突破(080526).docx

港股急升後回調 稍後或靠習特會消息突破 市場觀望中東局勢發展，美股急升過後，周四出現回吐。道指周三勁升超過600點後，周四延續強勢高開91點，最多曾漲219點，高見50130點，但隨即掉頭向下，最多跌422點，標指與納指盤中再破頂，標指最多抽高0.27%至7385，納指一度突破26000點關，高見26036，升幅達到0.76%，不過隨後齊倒跌。美市收市，道指倒跌313點或0.63%，報49596；標指下跌28點或0.38%，報7337；納指倒跌32點或0.13%，報25806。 重磅股當中，Nvidia及Tesla股價收市分別升1.8%及3.3%。不過其他次一線嘅科技股普遍回吐。CRWV短線累樍升幅係勁，見到噚日個NQ開市再升至28900水平，當時個RSI爆晒標，而CRWV一開市由138高位一開就落，兩下就穿埋上日個收市價，連另一半貨都以132元全數落車。盤後公司公布疲弱嘅營收指引，並預計未來支出將會增加，股價進一步插水落到115水平，穿埋120個防守位，咁下一個支持位係105-110，有呢啲位，阿Man會補返貨。至於NBIS仲未失個170防守位，但係基於噚晚NQ超買嚴重，一開市NBIS跌穿開市價同190美元，順手以189元車埋另一半貨出去，累積升太大嘅股份，短線食咗先無壞。盤後落到181美元，今晚睇住170呢個防守位，穿就等155至160美元先回補，用145-150做防守。ALAB又係咁，一開市即穿開市價，210車埋另一半貨出去，吼住有無185-195上返車，用個180做防守。個NQ啱啱先開始回調，睇嚟有機會整固一下先，修正一下個RSI，今晚個好淡分水嶺喺28700，支持28600/28500/28400，28400大約係條5日線左右。至於上面阻力28800/28900/29000。留意今晚有就業數據，到時市場又會從呢啲數據，去推斷聯儲局下一步點做。 美伊有望停火，恒指昨日高開317點後，一度升455點見26669，全日升412點報收26626，成交額則回升至3124億元，但北水卻錄得淨流出。至晚上美股急升後見回吐，夜期及ADR跟隨回落，今早黑期即重返26300至26400水平之間上落，今早港股順勢低開。恒指低開266點，報26359，早段跌幅曾收窄至202點，高見26424，但未有完全回補上升裂口，其後回吐壓力玥現，跌幅再擴大，最多跌351點，低見26274。恒指中午收報26335點，跌290點或1.09%。半日成交額1455億，北水又買返啲貨，錄得淨流入56.4億元。 雖然美伊仍未正式達成永久停火協議，但雙方似乎已對戰爭有所厭倦，加上霍爾木茲海峽若持續停航，對雙方亦無好處，料美伊雙方最終能達成永久停火協議，隨着債息回落，金價回穩，市場對風險資產偏好增加，不過暫時美伊仍見擦槍走火，紐約期油價再度回升至95美元之上，預期短線港股仍反覆。稍後中美元首會面，如中美雙方於貿易分歧上有突破性進展，或有望帶動港股追落後。短線港股急升後料隨外圍市場回吐，如能企穩25500水平，甚至25700水平亦能守穩，港股及後仍有望突破26500頭肩頂頸線水平，再挑戰27000關。本月仍有多隻重磅股公布業績，加上中美元首會面，或能帶動港股再往上突破。