【盤房來料】 半日回補部份下跌裂口反彈乏力(080626).docx

半日回補部份下跌裂口反彈乏力 美國就業數據強勁令市場加息預期升溫，加上晶片股捱沽，道指周五最多跌780點，收市仍挫695點或1.35%；標指回落2.64%，納指下滑4.18%，費城半導體指數急降10.26%，多隻重磅科技股跌逾一成；包括MU下跌13.2%，英特爾跌11.3%，ARM跌12.9%。另一方面，SpaceX正推進750億美元IPO，承銷商已被告知，不能接受來自香港及中國投資者認購，理由係美國對關鍵技術出口有限制。不過，SpaceX啟動IPO推介後即獲超額認購。由於SapceX招股料將抽走市場資金，再加上唔少投資者以槓桿進行交易美股，喺去槓桿效應下，上周五美股顯著下跌。目前美股借勢調整，或待SpaceX上市後，美股方能喘定，如SapceX再帶動氣氛，則美股調整過後，有條件再重拾升勢。 美股上周五跌到一仆一碌，手上嘅短炒貨，大部份都hit咗個止賺或止蝕位，暫時個美股倉無太大損傷，估佢唔到係盤後繼續插水，DELL盤中一度見過385，均價391又撈返半注，睇今晚反彈個400會唔會由前支持變為阻力。至於MU當然960中咗嘅貨，穿950喺945止蝕咗，其後擺返個855接近20日線接返，睇下今晚反彈上唔上得返900樓上，再挑戰返條10日線大約950，呢一注開市後上得返900樓上，就會用個895嚟止賺，上唔得返去900，個止賺會set喺880。至於MRVL穿280又止蝕咗279，不過喺接近10日線240，258又中返，個市跌得咁急，落到10日線，20日線呢啲位，之前強勢嘅股份，都要出手博下反彈，暫時MRVL睇下彈唔彈到上去5日線大約喺280左右，上唔返去都要食咗先。NBIS貪心喺270無落車，卒之250止咗，暫時未撈返，周五落到20日線約218左右有支持，今晚等開咗市再算。至於ONDS無穿10元仲持有，CRWV就100止蝕咗，都係今晚再睇。至於GOOG仍然守到360，但上唔返380都係麻麻地。AVAV已講咗唔守200會走先，始終無平貨喺下面，結果195止賺，暫時呢個板塊仍然受壓。CRML喺9.78買嘅貨亦持有，防守9元無變。INTC平貨底就無郁過，但103上車嘅短炒貨，99元止蝕咗。至於KLAR中咗16.8嘅貨，暫時防守16元未穿，若然穿16，15.8斬立決。 NQ一係升到你唔信，但跌起上嚟都唔係人咁品，上周五一穿分水嶺同上星期個range底30000就急轉直下，跌到唔識停，估計係大量投資者槓桿操作美股，喺去槓桿下，NQ愈跌愈急，20日線29700竟然一啲防守力都無，穿埋就落到28800，幾乎穿咗條20MA成千點先識停。雖然今日喺亞洲時段有反彈，但企唔穩29200/29300，有機會再回測29000支持。今晚NQ個分水嶺喺29100，支持29000/28900/28800，阻力29200/29300/29400，至於可唔可以上得返20MA約29700，企得返條20日線，NQ先可以叫穩定返。 港股都算衰過人，人哋創新高無份，跌嘅時候跟到足。港股上周表現強差人意，雖然周二一度爆升640點至26038超過兩星期高位，但其後三個交易日不僅將升幅抹去，至周五更跌穿周一低位，按周跌221點，連續四星期下跌。由於美股於周五受強勁就業數據影響，市場憂慮聯儲局不僅未能於年內減息，更有機會加息，美股三大指數下跌，進一步拖累夜期及ADR再跌至24500水平，黑期今早於24500水平徘徊，今早大市裂口低開。恒指今早低開379點，跌幅最多擴大至503點，低見24458。其後跌幅略為收窄，最高反彈至24837，仍未能全數回補下跌裂口，目前喺24600至2700水平爭持，半日收報24668，跌293點或1.18%，半日成交額1962.19億元，北水錄得淨流入49.35億元。 北水上周按周計算已錄得淨流入228.21億元，結束前兩周淨流出，反映有關早前監管機構打擊境外非法投資嘅影響已近尾聲。如今日港股能以先低後反彈姿態發展，全日以陽燭形態收市，即使即日未能回補全個下跌裂口，本周仍有機會回補下跌裂口，反彈至約25000水平，不過如大市無法企穩24800去年高位，後抽過後，不排除仍有機會再一次下試3月底部，即24200甚至24000水平，以完成1800-2000點月波幅。目前港股估值遠低於已先後創新高嘅美國、南韓、日本及台灣股市，除非外圍股市跌勢一發不可收拾，否則港股料於24000-24200有不俗支持，而反彈首個目標為25000及25400約10日線水平，但恒指如無法返250日線及20日線及50日線三線匯聚區約25700水平企穩，反彈過後或重拾跌勢，目前再觀察後續發展，不宜輕舉妄動。