【盤房來料】 油價衝高拖累環球股市受壓(090326).docx

油價衝高拖累環球股市受壓 美股上周五表現反覆，預咗喺中東局勢仍緊張下，各地股市繼續有震盪。上周五美股三大指數回軟，至周末期間，霍爾木茲海峽遭封鎖，刺激油價急升，突破100美元大關，拖累美股指數期貨急跌，今早亞太區股市全數仆直，當中以南韓及日本股市跌幅較大，但區內主要股市指數均跌超過2%，只有內地股市深滬指數跌少於1%。雖然特朗普表示將與以色列作共同決定，喺適當機結束對伊朗嘅軍事行動，但伊朗邁赫爾通訊社引述武裝部隊總參謀部聲明，指出武裝部隊喺哈梅內伊個仔穆傑塔巴領導下，將比以往任何時候都更加強大及堅定，為咗國家利益及安全，會堅決抵抗敵人，直至最後一刻。暫時伊朗戰事未有結束之象，油價持續高企，由於霍爾木茲海峽航道輸出石油幾近中斷，中東主要產油國紛紛減產，令油價高居不下。油價高企下，各國央行減息無望，各地股市亦易跌難升。 美股股指喺亞洲時段今早顯著回落，NQ更一度跌至24000水平，留意去年11月低位約23900，即管睇下今次係咪到咁上下位反彈，做返個雙底形態。個股方面，大部份股份都落返去啲支持位附近，守唔到啲支持位，而NQ跌破23900嘅話，後市跌勢將加劇。今晚NQ要睇實個23900支持，分水嶺為24050，反彈首個阻力為24150-24250；下一個阻力為24350-24400；短期上唔返24800都幾濕滯。至於下方穿23900呢個11月低位，下一個支持位大約係23750-23800，再落去就要到23600同23300先會有支持。即管望下今晚係咪23800-24400呢個範圍內上落。個股方面，暫時都係睇返手上有嘅貨守唔守到支持位，事關NQ跌穿23900嘅話，將會有一下插得急少少。 受中東戰火影響，港股3月開局即3連跌，恒生指數最多累跌1672點；上周四回穩，翌日周五進一步急彈435點至25757水平收市，但按周則仍要跌873點或3.27%。中東局勢仍然緊張，美伊戰事未有停火跡象，霍爾木茲海峽運輸中斷導致油價升至100美元水平，有分析指如中東局勢未見緩解，金融市場將持續震盪，環球股市有機會出現深度調整。 中東局勢仍困擾後市，尤其油價高企，不僅減慢美國減息步伐，甚至有機會令通脹復燃，而港股明顯轉弱。上週五夜期隨美股回落，再度大幅低水，較週五恒生指數收巿價低水愈400點，而假日黑期更跌穿25300水平。今早恒生指數低開681點，最多曾跌851點，低見24906，為本年度暫時低位，半日跌656點或2.54%，報25101，暫時叫守到條250日線；國企指數跌157點或1.83%，報8470；科指數跌115點或2.34%，報4831。半日成交2193億元，沽壓又唔叫好嚴重。大市短期能否見底，取決於25000關能否守穩。如今日大市低開，跌穿25000關收市，下方首個支持為24800-24850，而較大支持為24500-24600。至於今日出現下跌裂口，若今日午後回補，即反彈至25200-25250上周五低位，若然裂口回補後仍受困裂口底部，則視乎外圍市況，後市將進一步向下尋底。 留意本周美國多個重要經濟數據公布，包括消費物價指數(CPI)及個人消費開支(PCE)物價指數本周出爐。當地1月CPI降至2.4%，核心CPI也降至2.5%，預計兩者2月將維持不變。惟可能對市場產生更大影響係PCE數據，因為聯儲局對其關注度更高，而且與CPI數據不同，仍然徘徊在3%附近。JOLTs職位空缺數據亦將於周五(13日)公布。不過中東戰火下，油價急升，短期內聯儲局已無條件減息，反而注意及後油價有否令通脹重燃，唔減息之餘反令息口回升。暫時數據好壞，似乎已被高油價嘅負面因素所蓋過，加上日韓股市今早顯著下跌，港股暫時劫數難逃，今日收市守得住條250日線已算唔錯。 港股目前估值仍算合理，個別優質股更已調整至吸引水平，如業績表現理想，稍後有機會修復估值。不過在戰火陰霾下，有意吸納優質股份，亦有心理準備要分段買入，恒生指數25000點為250日線，亦是牛熊分界線之所在，如跌穿最好於三個交易日之內收復失地，若然真係突破向下，超過三個交易日收市低於此水平，恒生指數或進一步往24000水平尋找支持。