聖誕節假前減磅 1月再作資金配置
12月7日，天晴乾燥，涼咗幾日，今日又暖番，雖然一早一晚較為清涼，但都感覺唔到冬天嘅氣息。美股上周五做好，三大指數齊創收市新高，道指收報30218點，升248點；標指收報3699點，升32點；納指收報12464點，升87點。奇怪嘅係美股明明係無好消息，雖然疫苗進展理想，英美兩國民眾可於本月內開始接種疫苗，但美國做業數據差過預期，市場反而憧憬新一輪刺激經濟方案可落實，壞消息當好消息炒，港股暫時唔會有方向。
雖然疫苖消息理想，市場除憧憬美國新一輪刺激經濟放案將加快落實，而歐洲央行亦會有大規模救市行動外，市場上實在有唔少利淡消息存在，缸邊友不能忽視。好似美國制裁多間內地軍方背景企業後，富時羅素將剔走8隻被制裁嘅中資股，預期其他國際指數或會跟隨，對相關股份如中海油(00883) 股價及相關新聞 等構成壓力。而伊朗地綠政治因素亦不能忽視，喺好淡消息交替下，港股暫未見方向，而恒指喺過去兩周已多次挑戰二萬七關無功而回，可見此關阻力其大，而喺聖誕節長假期步近之際，市況只會更趨淡靜，港股或呈拉鋸局面，恒指仍然喺二萬七關前徘徊。
不過坊間不斷有分析指美股隨時爆發股災，古天后對此一直不表認同，從美元及黃金走勢反映，市場風險胃納持續增加，美匯指數已跌至兩年半低位，金價亦持續偏軟，喺環球資金極度充裕下，實在搵唔到一個股災會發生嘅根據。而隨住疫苗面世應用，疫情料可於明年首季受控，實體經濟可逐步復甦，有助支持企業盈利做好，股市享有較高估值仍可接受。
技術走勢上，恒指升至27040高位後未能企穩二萬七回吐，但一直穩守於二萬六關至上，回吐黃金比0.382影都唔見，可見港股偏強，近日於26500點之上徘徊，資金亦回流至新經濟股，新經濟股一直為本年大市火車頭，反映港股仍未扭轉強勢，只係欠缺新嘅利好消息下，暫未有條件攻頂。
提一提大家，仲有兩個星期放聖誕節長假，基金經理陸續放假，雖然北水係無聖誕放假概念嘅，但市況將會轉趨淡靜。建議呢段時間以短炒為主，盡量減低持倉量並多持現金，反而基金經理都已計數食糊，留待1月從新配置資金，再作新一年部署。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。