【盤房來料】 恒生指數100日線岌岌可危(180826).docx

恒生指數100日線岌岌可危 美國總統特朗普向霍士新聞表示，唔急於結束與伊朗戰爭，並告誡阿曼勿妨礙美國封鎖伊朗船隻，否則可能遭轟炸；跟住侵侵其後又話，美國唔尋求延長與伊朗簽署的諒解備忘錄，同時重申美方控制住霍爾木茲海峽。佢嘅言論利淡市場氣氛，美股周一普遍受壓，道指低開69點後，跌幅一度擴大至最多337點，低見53395，收市道指跌272點或0.51%，報53459；標指跌40點或0.52%，報7745；納指回吐84點或0.32%，報26644。 人工智能(AI)初創Anthropic據報第二季收入強勁增長，並轉為錄得經營溢利。重磅股中，SpaceX股價收市抽高4.7%，微軟則回落3%，Meta跌3.5%。Nike跌4%，為表現最差道指成份股；Caterpillar升2.9%，為升幅最大道指成份股。AI類股份繼續炒，但炒咗個幾星期，開始有回吐同埋抖抖氣，SNDK及MU股價分別抽升8.9%及4.1%，前者阿Man一向無炒，至於MU上到1000樓上後，臨瞓前擺咗1000止賺，至夜盤1000個止賺中咗，夜盤落到980左右，排返個968買盤，接近50MA睇下有冇得買返，晏啲如果980企得穩，或者先撈返半注先。DELL 就穿咗480收市，但望下條10MA喺466，加上呢隻本身係今年先入場玩，唔穿條10MA，435買嘅短炒貨未想落車住，反而想喺465-468再接多注，博佢上返500樓上。NVDA同INTC無郁過，繼續持有。NBIS喺270止賺咗，夜盤落過260邊，250美元條5MA守到，都搵位上返車，暫時排咗個買盤喺255，可能265都要先買一注。見美股好似穩定返，呢兩日想趁回吐抖氣睇有冇位買吓貨。MRVL無炒一段時間，見又落返250樓下，都調整得七七八八，之前200樓下錯過咗低位，依家接近幾條移動平均線，先喺227買四分一注先，另一個盤排217條10MA，最後一注207係接近20MA個位，全部用個200接近100MA做防守，博佢上得返236條50MA再展升浪。ALAB都係錯過嘅成條鯨魚尾嘅股，但作為AI 與雲端資料中心高速連接解決方案嘅半導體公司，似乎都係要重析關注，312買返注，300做防守，穿300就要等280-285先再上車。至於NQ噚晚見回吐，開市完全唔企30200個分水嶺，就落到29800呢個支持位守返住，今日個分水嶺喺29850，支持29750/29650/29550-29500，阻力29950/30050/30150-30200，噚日個分水嶺變咗短線阻力，企得到30050條5MA，就有機會上返30150-30200，企埋30200咁就睇前頂。 雖然昨日港股回升，恒生指數高開186點後，一度升461點至25578高位，曾收復20日線25512，可惜最後20日線得而復失，收市升幅收窄至336點或1.33%，報25453，成交額2107億元。夜期時段隨對股走軟，進一步跌穿25400水平，今早黑期於25300水平徘徊。恒指今早低開84點，報25368點後回穩，一度倒升3點，見25456半日高位，可惜仍然距離條20MA有啲遠，淡友即發力，上半場最多跌212點，低見25240，不過100日線(25175)反彈，大市喘定，跌勢略有緩和，喺25300水平幾十點上落，恒指半日收報25287，跌165點或0.65%。半日大市半日成交1365.22億元，北水淨流入73.65億元，貼近條100日線，北水買貨力度大咗啲。預期短線100日線25175仍有一定支持，而5 月線24950及日線保力加通道底部約24800水平為下一重要支持，而50日線24617及20月線24678不容有失。反彈首個阻力仍為10日線及20日線匯聚區25500-25550，亦為8月12日所遺下下跌裂口25498-25647範圍內，下於8月8日之上升裂口25669-25720亦為阻力，亦即250日線25750所在。 上周美國最新公布7月份 CPI及 PPI未有超出預期，加上油價稍為回落，市場即時大幅縮減對年內加息押注。截至上周五，市場最新定價已將首次加息時間延後至明年1月，而由現在至明年7月累計加息幅度亦只有0.38厘。資金流向方面，股市繼續有資金淨流入，但中國股票已連續兩星期錄得資金流出。內地數據再度浮現通縮憂慮，中國10年期國債孳息率更跌穿1.7厘，顯示內地資產吸引力仍然有限。聯儲局下月議息會議與Jackson Hole全球央行年會舉行前，將會公布更多通脹數據，年內未必一定完全唔加息。不過，目前環球流動性目前仍然充裕，銀行準備金水平超過2.9萬億美元，聯儲局暫停準備金管理購買(RMP)對市場影響有限，但長債壓力與中國資產持續弱勢，仍然不容忽視。港股自6月低位反彈至月初高位後，現水平已顯得乏力，未見更多新資金流入下，港股再上升動力有限，雖然目前未見港股有大跌跡象，但如恒指繼續受制20日線，短線往下考驗100日線甚至50日線機會甚大。