【盤房來料】 恒指暫守100日線 惟受制20日線成阻力(030926).docx

恒指暫守100日線 惟受制20日線成阻力 雖然美伊局勢仍緊張，但國際油價升勢暫緩，加上美國職位增長放慢，帶動債息從高位回落，美股三大指數反彈。道指周三曾反彈460點，收市升勢回順，收市升295點或0.56%，報53061；標指則反彈35點或0.46%，報7666；納指升118點或0.45%，報26217。 重磅股中，Meta及Nvidia股價收市分別升2.5%及3.2%，Nvidia係表現最強道指成份股。霍尼韋爾(Honeywell)回落1.9%，為跌幅最大道指成份股。DELL業績後急升15.8%，開盤見企唔穩480，嗱嗱聲472食咗先講，再放返個買盤喺435又係條50MA，繼續用420做防守，誰知盤中又真係殺到落去433，畀我撈返435，尾市推到上497，完全係賣大包，夜期暫時守住480，今晚睇下有冇驚喜，上唔上到500樓上，下面幾條移動平均線大約喺435-460，暫時睇住呢啲位先。MU喺929似乎落錯車，開市死死地氣喺435買返，暫時見又躝返上幾條平均線上面，守到950就持有先。MRVL半生不生咁款，又未企得返啲移動平均線，但上面又守到200，唯有再睇下今晚咩環境。CRWV情況差唔多，79個止蝕盤差少少被KO，今朝取消咗，依家喺79-85之間，條日線保力加底有少少向下打開，今晚企唔穩80都係落車先。 繼摩通後，富國銀行亦睇淡美股短期前景，指投資者愈益擔心人工智能(AI)熱潮能否持續，警告9月市場將呈現「普遍謹慎」情緒。其實9月份一向係美股傳統淡月，唔少投資者更擔心10月屬高危股災月，而咁啱美股8月份又創高位，9月份出現較大幅度調整亦無可厚非。值得留意係利率趨升。美國10年期國債孳息昨亞洲時段突破4.8厘，屬2024年以來最高；30年期債息亦反彈至挨近5.3厘，環球債息亦高企，不利後市發展。而聯儲局主席沃爺喺Jackson Hole全球央行年會發言放鷹，刺激美國加息預期再升溫，9月會否上調利率預計將屬上半月金融市場核心議題，自2024年9月開始寬鬆周期大致結束似無懸念，資金成本高企往往係股票嘅「估值殺手」。近期阿Man個短炒倉都縮晒水，戰線亦有咁短收到咁短，唔再似前一排，短炒倉同時炒住十隻八隻貨。NQ噚晚波幅細到，阿Man搵唔到位上落車，索性唔炒齋睇。今晚NQ分水嶺29150，支持29050/28950/28850-28800，阻力暫時喺29250/29350-29400，唔知係咪又窄幅等爆邊，都係嗰句，上面企唔穩29400都要小心，下面暫時28800要守住。 至於港股反覆，早段低開48點後，一度跌320點至25008低位，午後跌幅收窄至18點，報收25311，連跌3個交易日，成交額則只有2166億元。至夜期時段，美債息高位回落，美股反彈，帶動夜期一度反彈至25468高位，其後報收25367，今早黑期亦重返25400水平，今早恒指裂口高開，報25482曾擴大升幅至226點，見25538，可惜受制10日及20日線，至半日收市升幅幾乎全數蒸發，更一度倒跌16點，見25294。半日恒指報收25317，僅升6點。半日成交額1050.13億元，愈玩愈縮，咁嘅樣有少少陰乾feel。港股雖然暫守100日線(25222)，但反彈又企唔到10日線(25536)及20日線(25535)及10個月線(25504)，呢幾條線由之前支持變成阻力位，如恒指未能重返25600水平企穩，重越日線保力加通道中線之上，100日線及50日線久守必失，一旦美股進行更深度調整，或拖累港股齊齊往下尋找支持，50日線及100日線若再失守，則港股或先往24500及24200尋找支持。