【盤房來料】 港股險守100日線 慎防反彈已至尾聲(280726).docx

港股險守100日線 慎防反彈已至尾聲 美國及伊朗暫停交火，美國總統特朗普形容與伊朗談判非常良好，中東緊張局勢降溫，國際油價應聲而下，但美股嘅科技股仍然走軟，道指周一先升後回順，道指最多曾升660點，高見52607，隨後升幅收窄，收報52210，升262點或0.51%。標指微升1點或0.02%，報7413；半導體股再度受壓，納指彈1.15%後無以為繼，收市跌89點或0.18%，報24932。 中國存儲晶片製造龍頭長鑫科技喺上海科創板首日掛牌股價爆升，但未能帶動喺美國上市嘅記憶晶片股回升，SanDisk股價急插11%收市，SK海力士ADR早段反彈3%後掉頭，倒跌逾7%完場，失守上市價。阿Man個短炒倉，愈嚟愈空虛，噚晚見啲科技股勢色唔多對路，DELL都唔等420，見一開市穿440，追住個435就沽咗啲短炒貨走人，見盤後股價進一步回落，今晚睇下條20MA，420企唔企返穩，先決定上唔上返車。至於MU果然要冷靜下，940-970，暫時似由支持變阻力，一個唔覺意跌穿850，下一級支持就睇住780-800。INTL跌穿100後，跌勢加劇，夜盤喺亞洲時段失埋90個支持位，睇嚟98-108短線會由支持變為阻力。AI股插水，資金流入個別老登股，微軟MSFT終於硬起來，股價上到390美元，都要睇下企唔企得穩，企得穩下個阻力大約係398-400，暫時短炒得返MSFT同NVDA，NVDA無啦啦又穿返200，短炒嘅貨幾乎打回原形，短炒上到210邊有食唔食，自作自受，主要係呢隻貨底早就負成本，搞到大安旨意，一心想等啲短炒貨返上220，依家唯有睇下上唔上返200。至於NQ噚晚一跌穿28600個分水嶺就倒水，殺穿埋個28000，暫時喺28000邊沿徘徊。今晚個分水嶺下移至28000，支持27900/27800…..27800係條100MA附近，呢個位一穿，小心要落到去27500先再有支持，至於阻力28100/28200，企唔返個28200瓜多過菜，企到上面仲有28400/28500/28600都會變阻力。其實睇返NQ幅周線圖，已經成個圓頂出咗嚟，一旦跌穿27500，唔排除會展開更深度調整。 中東局勢緩和，紐約期油急跌7.5%，每桶報82.62元，拖累能源股受壓，埃克森美孚及雪佛龍股價分別跌1.3%及2.4%。航空股則造好，美國航空及聯合航空股價齊揚；皇家加勒比郵輪股價亦漲4%。摩根士丹利策略員Michael Wilson預期，美國投資者將資金輪換至優質股，專注於自由現金流回報及邊際利潤擴張。佢指出，如果中東戰爭升級或聯儲局本周出乎意料加息，美股將面臨短期調整，但標指於7000將有強大支持。RBC資本市場策略員Lori Calvasina重申，最新業績期顯示，美企喺宏觀經濟嚴峻情況下，成功捍衞盈利。標指成份企業每股盈利勝預期比率由前一季85%升至90%，收入好過估算比率則由80%降至76%。美國10年期債息跌3基點，報4.649厘，對息口較敏感的2年期債息降1基點，至4.322厘。美滙指數先跌後揚報101.51，日圓報163.73兌每美元。 至於恒指昨日反覆向好，恒指高開後，午後一度升313點見25276高位，略升穿上周高位25267，收市報25207，升243點或0.97%。不過成交額則只有2104億元，未能做到價量齊升。本周四期指結算，目前正處於轉倉高峰期，不排除結算前，港股繼續高位震盪，一方面完成周波幅及月波幅，另一方面，高位轉倉。近幾個交易日，大市處於二萬五水平之際，成交卻持續縮水未能配合升勢，提防市場購買力已近消耗盡，每每靠夜期支撐指數向上，恒指即使企穩100日線即25200水平後，再挑戰250日線即25700，若然成交量持續縮水，甚至市寛見背馳，反彈浪隨時已近尾聲，港股亦處於強弩之末狀態，提防結算後或出現調整。今早恒指高開64點，好友曾發動攻勢，大市最多升233點，高見25440掉頭，主要係外圍同A股顯著下跌，港股亦難獨善其身。恒指升幅逐步收窄並掉頭向下，曾最多跌137點，低見25069，但條5日線仲頂得住，其後跌勢回順，又彈返上50日線附近。恒指半日收市跌28點或0.11%，報25178，險守100日線(25177)。半日成交額1405.47億元，若然以早段走勢升至25400水平嚟講，呢個成交額都唔可以叫合格。留意返美國聯儲局呢兩日議息，暫時息率未必會有變動，通脹威脅未解除，短期都係難減息，不過又無逼切需要加息，睇個款大市或者要過埋結算先再有方向，暫時預佢喺25000上下兩三百點上落，期貨大戶順手搞埋轉倉，嚟緊要做調整，抑或再爆上去挑戰250日線，結算後會有更明確方向。至於阿Man就咁睇，250日線即係25700水平嘅阻力暫時仍然大得緊要，企唔返條250日線，又無新資金入場，8月上旬做返個調整，直至下個月業績期再睇下啲重磅股嘅成績表。暫時再追貨值博空間唔高，呢啲位不如食下花生等機會。