7月26日，大致天晴，但間中有一兩陣驟雨，日間天氣酷熱，稍後局部地區有狂風雷暴。喺美國聯儲局議息前，消費者信心指數升至兩年高位，令市場對美國經濟軟著陸信心加強，美股議息前靠穩，三大指數仍錄得升幅，而納指調整權重股比重，呢兩日亦未見對美股帶嚟影響。美國目前業績期，但早於唔少企業公布業績前，已見資金偷步買貨，令唔少企業公布業績後股價均見下跌，Tesla嘅走勢就相當明顯。而剛剛公布業績嘅通用汽車，營收及盈利均優於預期，並調升全年預測，但股價低開5%，幸而低位買盤吸納，收市跌幅收窄至3.5%。睇返同系嘅通用電氣股價表現卻氣勢如虹，資金輪動情況都幾明顯。
目前美股去到呢啲位都幾難搞，高居不下無乜可以上車，加上估值又唔係特別平，以重磅科技股嚟睇，一般PE都超過30倍，債息就有4%，而買股票暫時回率只有3%左右，股票投資嘅吸引力相對下降。雖然美國經濟未有陷入衰退，但能夠錄得盈利增長嘅公司，只係單位數增長，更有公司盈利仍然倒退，呢啲位先嚟追貨，值博率已唔高。
至於中港股市喺阿爺嘅政治局會議出重招救經濟下齊齊反彈，A股3大指數分別升超過2%，兩市成交回升至9481億元，樂觀啲睇係有好消息吸引部份資金入市，但就唔算多，9500億成交金額，仍遠低於6月底熱炒「中特估」嘅成交金額，股價當然係仲低過當時。睇返啲中概股表現，噚日唔少都係高開低走收陰燭，好消息爭住出貨，阿爺出招只係再次打開逃生門，無貨嘅當然多肯入場高追。
港股呢邊勁升4%，成交額增至近1500億元，似乎係有啲睇頭，只可能周一大市喺無原因及外圍未見急跌下，無啦啦插水407點，但當日就有近百億元北水淨流入，噚日大市勁升逾700點，北水就錄得淨流出超過60億元。其實呢個情況已經唔係第一次發生，北水彈出彈入，呢頭買完嗰頭走人，港股淪為日升日跌，賭大細嘅賭場。升升跌跌由大戶控制，散戶就一次又一次被割韭菜，試問韭菜割到連根都無埋，即使成功捕捉低位買貨，但坐貨過程極為痛苦，以阿里(09988)為例，畀你喺80元水平成功買貨，經過兩個月時間都只係錄得不足15%回報，仲要上上落落多次震倉，坐唔定又震走，咁嘅市況叫人點可以安安樂樂同你坐定定。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。