港股雖修復100日線但欠成交弱勢未改
雖然歐美接連有銀行爆雷，但瑞信已得到瑞士央行500億瑞郎貸款援助，而美國聯邦存款保險公司(FDIC)擔保SVB及Signature，兩者已決定拆骨出售業務解決流動性問題，而另一間出現問題嘅美國銀行FRB，得到11間美國其化銀行撐腰，暫時歐美銀行問題似乎受控，加上聯儲局資產負債表顯示上周大幅擴表，市場流動性充裕，美股隔晚反彈，三大指數上升，港股今早亦跟美股反彈，半日恒指升逾300點，成功修復100日線(約19397)。
恒指高開235點，開市已成功修復100日線，其後升幅擴大至393點，見19597半日高位後，升幅略為回順。恒指半日收19559，升355點；國指升159點，報收6638；恒科指半日勁升4.4%，中午報收3977。半日成交額677.86億元稍為增加，但以半日咁嘅升幅嚟計，完全唔夠睇頭。
藍籌股普遍反彈，港股呢邊嘅金融股隨歐美金融股反彈，友邦(01299)半日升2.4%，平保(02318)半日升2.9%；港交所(00388)半日彈2.4%；大笨象(00005)較弱，半日仲要跌0.6%。ATM全線反彈，美團(03690)半日升3.3%；騰訊(00700)半日升2.6%；阿里(09988)半日升1.9%；京東(09618)比較差，半日都無乜力反彈。反而百度(09888)半日急跌逾一成半，噚日發布AI產品文心一言，測試結果強差人意，股價急插，但今日就彈返晒，呢下真人有啲諗唔明，只可以話資金炒作，目前AI產品仍有待改進，相信百度需要投入更多資金，若然真係揀AI概念股，似乎美股中嘅微軟及Google更為可取。其他AI概念股乘機落鑊，都係炒作居多，參與炒作自己執生，有唔對路要識跳車。
內房股今日繼續反彈，內房股普遍反彈3%至近一成不等，不過阿Man都講咗好多次，呢個板塊要翻生，最終係要靠銷售復甦，一旦解決唔到賣樓問題，內房股都係有波幅，冇升幅。港股今日雖反彈，不過成交似乎未能配合，大市一日未能重返250日線(約19856)，以及收復20000水平，亦即20 日線(約20059)，再加上多條平均線正向下移，大市仍難扭轉弱勢。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。