【盤房來料】 恒指重上二萬五暫於100日線及20日線爭持(220926).docx

恒指重上二萬五暫於100日線及20日線爭持 中美元首落實會晤日期，利好市場氣氛，加上原油價格及美債息回落，美股周一造好，三大指數顯著上升。道指一度揚升超過400點，納指更一度升2.49%，高見27183，逼近即市歷史高位27190。美市收市，道指升366點或0.71%，報52048；標指升114點或1.49%，報7764；納指升2.26%，報27122，創收市歷史新高。晶片股及AI相關股份急升，費城半導體指數上漲4.29%，報12433，美股單日市值增長1.2萬億美元。重磅股中，Meta新推出AI智能體Muse大受歡迎，股價收市急升逾一成。AMD及Arm分別急升10%及17.2%，AMD市值首次突破1萬億美元。DELL愈升愈有，破頂唔估頂，有貨嘅推高個防守位坐定定，阿Man無貨見回踩5MA都唔追住，反而佢有550條10MA守到先考慮。INTC等唔到105-110，唯有115衝住一注先，暫時用105-108做防守，博股價企穩120再拾級而上，收市股價升12.1%，盤後仲企到120，高追就唯有步步為營，上升形態一走樣就走為上着。Alphabet及微軟都抽高1.6%，GOOG同MSFT算係咁，328買嘅GOOG同495買MSFT暫時有微利。NBIS喺219補嘅貨，阿Man係當自己210買嗰一注無落過車，食咗220又買返219，戰友笑阿Man為乜要出出入入，暫時用返個218-225做防守。AVAV喺160水平整固，158上車未見有乜着數，總之150要守住，畢竟估值唔算平。MRVL一直係阿Man短炒倉內嘅福星，218買嘅貨，都無乜受個威脅，慢慢上呢種走勢最得我歡心，依家可以用個230-238嚟做防守。市場資金再度risk on，比特幣逼近8.7萬美元，曾升7.9%至86992美元，創8個月新高，加密貨幣相關股份繼續有追捧，Coinbase、Strategy及Circle升幅介乎3%至9.5%，Strategy自8月以來首次吸納比特幣，涉7570萬美元。噚日個NQ勁爆，現貨NDX創咗收市新高，今早亞洲時段仲係keep住高位，今晚NQ個分水嶺喺30750，支持30650/30550/30450/30350-30300。歷史高位30975僅一步之距，暫時先當呢個位係阻力先，破頂就唔估頂，回撤時睇支持位。 油價連跌4天，紐約期油重挫4.51%，每桶收報95.78美元，布蘭特期油滑落3.4%，收報100.34美元；美國10年期債息曾回落5.53個基點至4.9408厘，2年期債息降4.43個基點至4.699厘。兩大石油巨頭埃克森美孚及雪佛龍股價逆市跌2.8%及3.2%，雪佛龍為表現最差道指成份股；相反，油價回落紓緩航空公司成本壓力，聯合航空及美國航空股價分別升5.2%及4.7%。雖然市場氣氛回緩，資金再度risk on，但摩根士丹利策略員Michael Wilson唱反調，指能源價格可能進一步上漲及債市波動，美股或面臨回調最多7%。如果金融條件進一步收緊並導致股市估值出現調整，標指有機會下試最低7100點，股市喺美國11月中期選舉期間亦料出現波動，不過穩健嘅企業盈利前景推動下，美股之後將重展升勢，標指到今年底將升近8000目標，即較上周五有近5%升幅。美滙指數曾升0.23%，至100.45；日本「白銀周」假期持續至周三，滙市交投淡靜，日圓下降0.41%，至157.53兌每美元。RBC BlueBay資產管理定息收入投資總監Mark Dowding指出，日本央行上周加息僅維持與歐美息差，相信直到開始收窄前，日圓勢難大幅攀升。 隨住油價回吐，市場亦已消化通脹及加息預期，習特會落實本周舉行，市場憧憬中美貿易博奕上或可突破樽頸，雙方或能達成更多貿易協議，或於各領域上加強合作，昨日中港股市做好，而美股三大指數亦錄得顯著升幅。昨日港股略為低開後即扭轉跌勢，午後升幅進一步擴大，恒指升291點並以全日高位25042收市，不過成交額只有2027億元，未見價量齊升，但北水已連續第十一個交易日錄得淨流入，噚日淨流入資金更逾40億元，一直支撐港股由低位反彈。晚上美股做好下，夜期及ADR進一步上升至25100水平。恒指高開128點，一度出現回吐，升幅收窄至僅升1點，低見25044點，其後好友繼續發力，上半場最多升211點，高見25254，一口氣修復100日線及20日線，其後喺20日線爭持；恒指半日收報25131，升89點或0.36%。恒指今日成功回補9月10日所遺下嘅下跌裂口，不過未能企穩20日線及受制裂口頂部，若然再重返裂口底部25021再穿25000，噚日同今日嘅短暫升勢，只能視為一個後抽，未能確定大市已見底回升。不過大市半日成交1460.58億元有所回升，北水淨流入68.15億元，已連續第12個交易日錄得淨流入，北水一直係大市由24300水平開始反彈嘅主要掃貨資金。 短線港股反彈阻力25200/25300，企穩25300，則有望扭轉向下尋底格局，進一步向上往日線保力加頂部及250日線推進，不過一直未見新資金流入港股，僅靠北水掃貨令港股上升動力不足，暫時仍困於日線保力加通道內，而中線反彈一浪低於一浪格局暫未改。留意周初市場憧憬習特會舉行，利好市場氣氛，一旦訪美之行結束後，未見任何利好中資企業政策落實，港股或有打回原形，能否成功收復全部移動平均線，並突破保力加頂部阻力，將為港股後市表現關鍵。