大市成功挑戰100日線後回補9月中裂口
12月1日，天氣顯著轉涼，密雲，間中有一兩陣驟雨。隔晚美股大幅向上，主要係小非農新增職位只增加12.7萬份，遠遜預期，反映美國經濟放緩力度加大，等同通脹壓力減退下，鮑爺講話開始轉軚，由鷹變鴿，表示12月放緩加息，美股即見反應。道指升逾2%，標指跟納指分別升3.09%及4.41%，標指逼近4100阻力，但要衝破唔容易，呢段時間可能都仲要喺3900-4100之間上落，但通脹見頂回落，息口亦見頂，後市仍可以睇高一線。
目前美股嘅關鍵係通脹同息口，只要通脹受控，PCE回落至2%，息口就有機會回落至4%樓下，明年通脹唔再向上，去到明年下半年或2024年初，息口有望掉頭向下。美國息口無可能長期高企，主要係美國債務高企，債務高達31萬億美元，若息口長期維持5%，美債需要負擔嘅利息已超過1萬億美元，為咗減輕利息支出負擔，終歸息口都要回落，大前題係通脹受控，就業市場平穩。
美國嘅經濟數據，顥示美國並未有步入滯脹苦況，雖然零售業錄得倒退，但情況只係輕微，去庫存亦比預期快，只用咗兩季時間，大部份零售商已從新由去庫存，轉去回補庫存。至於就業市場更持續強勁，市場上仍有逾千萬個職位空缺，只要通脹受控，美國經濟就可以避過硬著陸。
至於港股周初低見17000水平，成功守住20日及50日線後，隨即再展升浪，噚日順利升破100日線，100日線呢個阻力，將演變為支持位。由於隔晚美股急升，ADR及夜期亦已升抵19000大關，今日好大機會回補9月中喺19300回落至18800所遺下嘅下跌裂口，不過當裂回補後，大市重返19000水平之下，唔排除短線急升超買下，需要作出回吐調整，而100日線約18400左右，會成為今次回調嘅支持。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。