【盤房來料】 美國重要通脹數據公布前 港股先向下破二萬五(100926).docx

美國重要通脹數據公布前 港股先下破二萬五 美伊雙方遲遲未再回談判桌，戰事未見緩和，雙方各自對運油輪施襲，伊朗支持嘅也門胡塞武裝更攻擊沙特阿拉伯能源設施，帶動布蘭特期油自7月24日以來首次升穿每桶100美元，全球通脹加劇升溫，拖累美股噚晚三大指數下跌，道指低開78點後，跌幅擴大至最多471點，低見52314，收市跌405點或0.77%，報52380；標指跌37點或0.48%，報7636；納指跌168點或0.64%，報26253。 布蘭特期油一度抽升3.74%，高見101.58美元，收報101.21美元，首次報收喺100美元樓上。不過摩根大通認為，即使中東「永久衝突」情景下導致霍爾木茲海峽繼續被封鎖，布蘭特期油明年平均仍會回落至87美元；基本情景平均油價則為63美元，呢個假設係踏入2027年後將實現和平。該行商品研究主管Natasha Kaneva指出，石油庫存下降速度遠慢過戰爭初期所預測，石油流動展現出韌性，消費需求下降會產生市場調節作用。 重磅股中，Alphabet係表現最差道指成份股，無啦啦跌咗2.3%，但反而提供咗畀阿Man一個撈貨機會，328接咗一注，有條250MA喺319，7月底個低位喺314，用呢啲位嚟睇住做防守。由於阿Man個短炒倉太空虛，見DELL幅日線圖行咗個上升神奇九轉嘅第五轉出嚟，忍唔住542買咗少少貨，盤前買完開市上過562，但收市插返去535收市，強勢股就睇住條5MA先，落到520-525附近，睇下加唔加多注。呢兩日阿Man都講咗，計劃當CPI及PPI公布，連同下周FOMC議息，若然美股見震盪，就吼位買返啲優質股，DELL係其中一個目標，但心急人忍唔住追咗貨，唯有坐陣先，唔穿520就再加注。MU其實同樣行緊個上升神奇九轉第五轉，暫時條5MA同10MA分別係992同965，個移動區間應該就上移一級，由880至1080，上移去950至1150，呢幾日睇下950-980企唔企得穩，企到搵個位撈貨。其他喺觀察名單嘅股份，ALAB擺個295買盤上咗車，今次生生性性，守住個290再上過，目標係320-350先。蘋果舉行發布會推出可折疊屏幕iPhone DUO，香港地區起售價17499港元，但似乎市場唔係好buy呢件新品，股價先跌2%，收市跌幅收窄至0.3%。定價要2000美元樓上嘅手機，銷情係點真係要睇市場接受程度，其實摺Mon機都唔係乜新嘢，三星同華為晨早已出咗摺Mon機，對果粉嚟講呢款iPhone DUO係等到頸都長，阿Man換唔換機仲係舉棋不定，但確實有啲心動，預計呢部機銷情會唔錯，股價落咗鯈MA，若然有308-310，接近條20周線，未買到新電話，就買住蘋果股份先。至於NQ繼續窄幅上落，未有突破29200至29600呢個框框，今晚嘅CPI結果或者有助打破悶局。暫時NQ個分水嶺喺29450，支持29350/29250-29200，上方阻力29550/29600/29650，企到29650可以玩返上去29800-30000，相反，跌穿29200，就玩落去29000/28800。 之前阿Man跳咗掣咁走晒短炒倉啲貨，係因為擔心9月同10月通常係美股調整月份，其實有咁嘅諗法嘅投資者係唔少，好似RBC資本市場策略員Lori Calvasina認為，美股回調10%風險正增加，指出人工智能(AI)成為今次美國中期選舉議題，可能加劇AI股波動，同時伊朗戰爭繼續成為市場逆風。佢又提到美股進入季節性疲弱時段，過去10年間，標指有5年於9月份錄得跌幅，但對長線前景仍樂觀，維持未來12個月升標指升至8150目標。不過長線睇法阿Man都係以美股為王道，回調反而係執平貨好機會。美國10年期債息曾升5.6個基點，報4.86厘，對息口較敏感2年期債息升3.4個基點，至4.432厘，創2024年7月以來高位。美國財政部最新將長年期國債回購規模擴大至60億美元，為原來上限3倍，財長貝桑此前表示，上月宣布擴大回購規模，企圖令債市降溫，不過睇返啲債息反應，似乎市場唔多滿意個回購規模。 港股自周一高開低走，恒生指數當日失守20日線，以接近全日低位收市後，連續三個交易日收市均處於10日線及20日線之下，昨日收市更首次跌穿10周線，成交維持淡靜，只有2049億元。雖然北水已連續三日錄得淨流入，但仍未能扭轉港股再度轉弱勢頭。至夜期時段，美股走軟，三大指數收市下跌，拖累夜期顯著下跌逾200點，更失守25000大關，黑期今早亦處於25000水平之下，恒指低開289點，報24985，一開波淡友已唔係人咁品，忍咗幾日啲好友守住嘅50MA同100MA，一口氣打穿晒，跌幅擴大至最多385點，低見24889，其後持續低位徘徊。恒指半日收報24949點，跌325點或1.29%。大市半日成交1058.58億元，北水淨流入34.8億元，已連續四日都錄得淨流入。 個市都算係向下突破咗，苦守多時嘅50日線及100日線，兩線已逼近25200，料將成為今日反彈阻力。除非今日下半場，港股能以V型走勢收復所有失地，否則後市港股將持續偏軟。而反彈首個阻力為25000-25050，剛好為20周線及日線保力加通道底部附近，留意24950剛好為20月線爭持緊，一旦失守，大市繼續往下尋找支持。下一支持為24800-24850，失守下一重要支持為24500。今明兩晚將分別公布PPI及CPI，料市場將關注此兩個數據對下周聯儲局議息帶來重要影響。