港股能否續彈關鍵為10日線15500水平
11月3日，颱風過後，多雲，有幾陣驟雨，天氣清涼。美股隔晚相當波動，聯儲局宣布加息後，美股一度倒升，但當鮑爺又出嚟放鷹，表示未有耐可以減息之後，美股再度偏軟，三大指數下跌，道指跌505點，標指跌96點；納指更跌逾3%，跌366點。標指繼續受制反彈阻力，議息後連短線支持位3800都企唔住，而債息仍高企於4%之上，科技股都係無運行，納指呢一轉反彈力弱過道指跟標指，但一回吐壓力就大過其他指數。
睇住幾隻重磅龍頭科技股，就係決定美股走向嘅指標，先講龍頭中嘅龍頭蘋果公司，上月跌至134美，即帶領美股展開反彈，不過股價仍受制於反彈阻力，仍未能成功轉勢重返152美元之上。其後借業績公布一度衝破阻力，以為真係扭轉之前弱勢，可惜兩日唔夠又重返145美元，可見美股10月嘅上升，只能視為反彈，並非真正轉勢。而集團喺iPhone14第三季度銷售表現出色之際，未有增加台積電晶片訂單，反映公司其實唔多睇好嚟緊下一季甚至明年產品銷售，加上公司凍結請人至明年9月，股價自然再度回軟。另一隻龍頭Tesla同樣係大市指標，雖然第三季銷售增長56%，不過市場唔賣帳，近日反彈力度偏弱，股價更未能遠低於9月高位313美元，主要係資金流出電力車板塊，業績好反而係出貨機會。目前Tesla最大問題係產能追唔上銷售，加上未來更多同業加入競爭，Tesla嘅市佔率將會下降，近日減價已反映行業競爭愈嚟愈白熱化。
雖然鮑爺講到明12月開始會放緩加息步伐，但下個月加息5%機會仍然高，但鮑釼講到明未有條件減息，即係加息周期要拉長，當然市場就解讀為明年減息機會有限，而9月FOMC預計息率將於4.6%見頂，但都要睇通脹係咪受控，呢個就係隔晚美股跌嘅原因。鮑爺已多次強調要將通脹壓至2%水平之下，最快要到明年CPI先有機會落到去3%水平，按過往紀錄，息率高過通脹2%就能有效壓止通脹惡化，以12月息率升至4.25%，即係明年仲要加多兩至三次息，將息率加至5%水平，即可成功控制通脹。最快要等通脹回落至2%或以下，FOMC先有條件減息。
至於港股跟A股，前者因為颱風關係，只有半日市，A股繼續炒通關，放寛防疫消息，但外資似乎仍未對A股回復信心，外資繼續流出。至於港股連續兩日反彈，噚日大半日市仍錄得過千億成交，恒指升371點，更升至15800水平，成功企喺10日線之上，繼續示為反彈，但港股要成功扭轉弱勢，至少要重返20日線水平，即16200左右，先講得上轉勢，至於反彈可以持續與否，要睇10日線15500水平能守穩與否，未能企穩10日線，好友呢兩日嘅努力都係徒然。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。