美股隔晚略回，聯儲局6月份議息紀錄偏鷹，會上大部份委員都支持今年再加息兩次，雖然暫時核心通脹仍然向下，但工資高企，隨時令通脹反彈，所以再加兩次息亦算合理。不過美股喺資金仍充裕下，暫時未見太大回調壓力，只係財政部喺債務上限提高下，繼續發債，或有機會再抽走市場資金，流動性持續收緊，美股即使唔出現大幅度調整，都難以再大幅再升，換句話講，現水平入場博美股，值博率已大大降低，暫時仍持有美股可以繼續坐定定，但無貨想入場，就要畀少少耐性等回調。
至於港股喺人民幣弱勢下，周初反彈兩日，噚日已抹去返彈半數升幅，雖然恒指守住10日線(19021)，但期指喺夜期時段，已率先跌穿10日線及萬九大關，今日亞太區股市下跌，港股當然未能倖免，半日失守萬九大關，一度跌逾600點。
恒指低開269點，開市即失19000及10日線，早段曾隨A股及人仔低位反彈，跌幅一度收窄至137點，見18973半日高位，可惜萬九關跟10日線支持變阻力，大市沽壓再現，跌穿18800點上周低位兼短線支持後，跌勢加劇直瀉606點，至18500水平另一支持位方見喘定，半日低見18503點。恒指半日報收18522，跌587點；國指跌230點，報6259；恒科指跌91點，再度失守4000大關，報收3924。話就話成交縮水，但半日跌市成交增至530.76億元，可見沽壓都唔嘢少，相對近日平均成交。
藍籌股全軍覆沒，80隻成份股難逃一跌，ATMJB全線向下，騰訊(00700)跟阿里(09988)分別跌2.2%及2%；美團(03690)跟京東(09618)跌逾3%，百度(09888)半日跌1.8%，跟網易(09999)跌幅相約，已算跌少咗。港股成交低迷下，政府無考慮減印花稅刺激返成交，官員死口唔認加印花稅令港股成交減少，咁港交所(00388)一向係全球交易所以中，估值偏高嘅，成交持續低迷，唔沽死佢沽邊個，半日股價再跌3%，阿Man都無馬後炮，話咗港交所上唔返300水平，只有繼續向下尋找支持。大笨象(00005)半日跌少過1%，已經比起友邦(01299)半日跌3.5%好好多。
內銀股今日遭殃，有消息指內地要求銀行收緊投資自貿區債券，而高盛又出報告調低內銀股目標價，全部內銀均見下跌，郵儲行(01658)跌0.7%已經算頂得下，其餘內銀股跌幅由超過1%至4%不等。阿Man一向唔睇好內銀股，亦講咗好多次，唔好見內銀股息率高就被美息所迷，內銀股息高係因為股價低殘，要搵高息股收息，都要其盈利能力有返咁上下先有條件坐住財息兼收，否則只會收息輸價，所收利息亦補償唔到股價下跌，本金貶值。
餐飲股未能止跌，今日繼續捱沽，整個板塊下跌至少3%以上，九毛九(09922)半日更跌6.5%。要數呢期最強板塊，就只有汽車股，除咗交付量節節上升帶動股價向下，華晨(01114)有意再派特別股息，股價半日升12.8%，其他汽車股個別發展，就算無份逆市上升嘅，跌幅有限，已經跑贏大市。
阿Man講咗幾日，大市先後失守多條移動平均線，幾乎可以肯定由5月低位嘅反彈浪已完結，一旦跌穿18800點，定必繼續向下尋底，睇相佬呃你十年八年，阿Man呢頭講完，嗰頭就應驗。今日大市失守18800水平，18500係短線支持，再失守睇怕萬八關難保，之前坊間有人話港股喺5月已見底，只係一廂情願嘅想法，經濟喺疫情復常後，未見復甦，外資撤走未見回頭，咁嘅情況港股下半年又點可以好得過上半年，能夠守住17000-18000水平，下半年上上落落，但22000嘅1月高位上唔返去，港股咪又係應驗咗有波幅，冇升幅。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。