【盤房來料】 港股受制11月高位回調先補上升裂口(130126).docx

港股受制11月高位回調先補上升裂口 美股噚晚都算勁，雖然有兩個負面消息，分別係特朗普提出1月20日起限制信用卡利率於10厘一年，金融股因此受壓，一度拖累道指早段跌近500點；加上美國司法部就聯儲局總部翻新工程國會證詞，向主席鮑威爾提出刑事訴訟，令市場質疑聯儲局獨立性將受影響，但喺市場氣氛仍高漲下，道指跟標指盤中再破頂兼創收市新高，而納指亦倒升收市。資金追捧中概股，反映中概股表現嘅金龍指數更升逾4%，當中阿里巴巴(09988)ADS升逾一成，較昨日本港收市價升多5%。喺咁嘅情景下，噚晚個夜期同ADR又再急升，夜期高見27000水平。噚日阿Man講過26600可能係恒指短線阻力，但企得穩呢，就可以突破上周高位26858，結果收市恒指一躍而上，就企咗喺26600之上收市。 期指喺夜期延續升勢，今早港股開亦，即遺下巨大上升裂口逾300點，雖然早段曾高見27143，暫受制11月高位27188，成功挑戰27000阻力，但就未去到27200嘅第二個阻力位。至中午收市前，今日仍遺下上升裂口26608至26839，裂口仍達231點。由於半日報收於開市價26958之下，不過仍守上周二高位25858之上，一旦下半場再重返早市開市價上，本周仍有條件再挑戰27200-27400，繼續向上擴大波幅及完成月波幅。暫時月波幅1513點，以近日成交回升嚟講，1500點嘅月波幅未必足夠。相反，下半場下破25800，則有機會再回補部份上升裂口，但睇返個A股回調壓力有限，港股跟隨A股步伐嘅話，25800多數守住，一旦失守，暫時下方首個支持為26700-26750，較大支持為26600噚日嘅收市價附近。後市能否更上一層樓，再挑戰11月高位及10月去年頂部，取決於26800及26600能否由前阻力變為支持。港股仍處於強勢之中，短線係回調至支持位買入，現階段做淡風險仍高，只能博盤中小幅度回調，逆向博回調，有糊要識食，況且呢啲高難度動作，無謂勉強自己向難度挑戰。個股方面，噚日提過嘅小鵬汽車(09868)都係裂口高開，噚日無上車無貨，暫時追貨有啲難度，始於開咗支陰燭出嚟，一旦個市回去補裂口，小鵬都會跟返個市回去80元水平附近。今日睇返隻中生製藥(01177)，走勢見突破，企穩7元，上面目標先睇返個8至8.5元，下方用個6.5元做防守。公司旗下藥品penpulimab首次成功進入醫保目錄；anlotinib獲准擴展至軟組織肉瘤一線治療，而且未有任何降價，而Yilishu 因報銷範圍擴大而受惠。 至於美股方面，三大指數仍以納指表現較落後，睇返噚日嘅走勢，NQ仍然無法突破上落區間頂部個25950-26000，果然係去到呢個位又掉頭，不過下方支持好似行上咗一級去到25600左右，個好淡分界線亦推高一級去到25800-25850，暫時做咗個一底高一底嘅三角形出嚟，只要企穩26000，咁個納指就有機會追返落後，挑戰前高位大約係26400水平。至於個股噚日提到嘅萬國數據GDS，又係無機會上車，仲一嘢打爆咗個42，仲見過45至46高位，但盤後股價回落至42水平之下，削去一半升幅，不妨再等下有冇40邊先搵位上車。今日美股無乜心水，或者吼下隻RDW，都係啲太空概念股，公司係一間太空基礎設施公司，於2020年由AE Industrial Partners成立，產品包括導航傳感器、太陽能陣列、可展開結構、空間製造和機器人手臂等技術。此外，公司擁有用於太陽能發電和太空3D打印及製造知識產權，可以幫助其客戶解決未來太空任務嘅複雜問題。吼位喺10元邊上車，今年目標大約係12至14美元。短炒用返個9.5做防守。