【盤房來料】 港股下試二萬四支持守穩短線反彈(110626).docx

港股下試二萬四支持守穩短線反彈 美國5月份整體通脹升上3年高位，中東局勢再度緊張，美伊雙方談判毫無進展，美股周三又回復跌勢，道指喺工業股及晶片股拖累下急瀉逾950點，失守5萬整數心理關口；道指低開111點後，跌幅擴大至最多963點，低見49909，美市收市，道指報49918，跌953點或1.87%；標指跌119點或1.62%，報7266；納指跌509點或1.98%，報2516。美伊戰爭推高能源價格，美國5月份消費物價指數(CPI)按年升幅從4月的3.8%，加快至4.2%，創2023年初以來最快增速，符合預期，按月增幅則從4月的0.6%放慢至0.5%，與預測一致。雖然美國整體通脹升溫，但5月份運輸服務、醫療保險及新車價格均下降，或有助紓緩聯儲局下周議息會議時所面對加息壓力。因為咁樣，早段係太差，唔少科技股仲見反彈，MU一度高見949美元，結果留低嘅一注，928元止賺埋，又擺返個868，接近20MA又接返貨，對於MU長線有信心，但短線個市太波動，都係步步為營。MRVL喺249接嘅貨，一心想等佢上返300，結果270就掉頭，263止賺後，死心不息，250左右又買返，博佢今晚上返條10MA，不過260條10MA未企穩，都要金睛火眼睇住。DELL貪心想等400，彈到398就用個388止賺，穿返5MA同10MA先撤退，20MA喺332，368同338分別擺定買盤，暫時中返個368，DELL都係嗰句，有政府做佢後偱，中線睇上返450-500問題不大。NBIS直情係派米，203撈返嘅又有超過一成進漲，見上到230又貪心，結果係返轉頭喺223止賺，再喺208補返，保佢大要守住200。ONDS、KLAR同GOOG同NVDA繼續持有，呢幾隻貨量較少，除咗KLAR係最近先上車嘅，其餘三隻都係低位有平貨同埋低位炒上嚟有盈利嘅，咁我就容易度大少少。不過都係嗰句，美股近日波動唔係人咁品，阿Man就無槓桿無孖展，否則一下急回真係畀佢冚到嘴都歪。 NQ噚晚公布CPI符合預期後，開市企穩個分水嶺就，不過彈到最後一個阻力位29200又無以為繼，其後侵侵同伊朗再度擦槍走火，結果拖累個NQ今早喺亞洲時段一路回到去噚日提供嘅最後一個支持位28400先反彈，支持同阻力行到盡又800點波幅。今晚NQ個分水嶺喺28600，支持28500/28400/28300，阻力28700/28800/28900，波幅睇下會唔會收縮返小小，企到28600都唔穿嘅話，PPI公布過到關，企埋個28900最後一個阻力，或者可以彈多少少，上返去29000至29300，盤中最大阻力係29300。 恒生指數已連跌六個交易日，為8個月以嚟最長跌勢，昨日恒生指數低開123點後跌勢持續，最多358點至24207，全日跌157點或0.64%，報24407，成交額3205億，雖然北水持續錄得淨流入，但亦無法終止港股跌勢。美國隔晚公布CPI，數據符合預期，不過5月份整體通脹升至3年高位，幸好運輸服務、醫療保險及新車價格均下降，或紓緩聯儲局下周聯儲局議息會議時所面對嘅加息壓力。數據公布後，美債息上升，市場押注今年底前聯儲局將加息一次。與此同時，美伊雙方又爆發衝突，刺激油價回升，紐約期油又返重90美元之上。雖然夜期略有反彈，仍較現貨收市底水，而黑期則回軟。恒指今早低開27點，報24380，早段曾反彈84點，高見24492，可惜A股開市走軟，拖累港股再跌穿24400，淡友又得逞，恒指最多跌408點，低見23999後反彈，暫時牛證重貨區回收咗七八成，短線個24000企得返，連跌七個交易日都應該開始有啲反彈。只不過反彈都係阻力重重，暫時24200前底成為短線反彈第一個阻力，至少要企穩呢個位，先有本事再彈多啲去24400-24500嘅下一阻力。由於周一周二曾力守24400，企得穩24400，暫可視24000為本輪調整浪底，反彈黃金比0.5目標為25000。由於6月高低波幅已達2000點，料已滿足月波幅需求，如外圍市況喘穩反彈，港股亦有機做返個反彈浪。