【盤房來料】 港股裂口低開向下補裂口機會大增(111126).docx

港股裂口低開向下補裂口機會大增 美國公布CPI高於預期，加上聯儲局官員放鷹，令美國下月加息預期升溫，美股反彈告一段落。道指噚晚回吐逾400點後跌幅收窄，收市道指報52231，跌157點或0.3%；標指回吐28點或0.38%，報7520；納指跌187點或0.74%，報25065。 美股盤中曾再受科技股拖累，納指一度回落1.73%，當中，Nvidia股價一度續再跌7.2%，低見165.89美元，市值曾跌破4萬億美元，自去年7月9日以來，收市市值一直維持4萬億美元以上；輝達收市股價仍跌5.5%，報168.8美元，為表現最差道指成份股。阿Man本來就坐住均價195嘅短炒貨，因為CEO出軌呢單嘢，股價插咗去170-180，都打算加注，結果喺169左右再加double，暫時均價拉到180左右，收市帳面仲坐艇超過10元，夜盤上返172，睇下呢次桃色風暴過後，股價可唔可以上返180-200，回歸合理價值。MU短炒再放咗680同660嘅買盤，完全無影就彈上700樓上，然後因為孤寒無追貨，然後已沒然後，暫時盤後上到750樓上，有撈平貨未走嘅，可以睇返個750-780嚟做短炒目標。SPCX喺136上返車，124嘅買盤無雷公咁遠就梗係買唔到，加多一注140，暫時均價138，策略上會拎一半出嚟短炒，暫時一半擺喺148條50日線前睇有冇短炒食一食，股價再見130-140又撈返咁樣做；逼近120加注；盤後股價上返140樓上靠穩。至於AMZN、GOOG同META無郁過，阿Man之前提過，踏入11月開始，會少啲炒美股，除非再有大震盪就博反彈，暫時長線持有嘅股份照舊唔郁，至於部份短炒嘅AMZN。GOOG同META則見機行事，反正長倉內都有呢幾隻貨，短炒嘅有利潤唔排除12月會埋單計數。 美國勞工統計局(BLS)公布，10月份消費物價指數(CPI)按月增幅從9月0.6%，放慢至0.4%，但高過預期升0.3%，期內扣除食品和能源核心CPI按月增幅維持於0.3%，亦高過預期增長0.2%。由於去年華府停擺導致無法收集數據，因此按年比較數據有所缺失。數據公布後，美國10年期債息最多急升16個基點，至5.023厘，重返5厘之上；對息口較敏感嘅2年期債息跳升21.6基點，至4.763厘。貨幣市場顯示，交易員現時押注聯儲局於2027年中前至少加息兩次，12月加息半厘機會率亦增至11%。聯儲局理事Christopher Waller於倫敦發表演說時表示，力撐當聯儲局12月加息，並警告如果通脹加速，將支持大手加息至半厘，以捍衞當局政策信譽。其實完咗中期選舉，聯儲局更無顧慮，一旦通脹怪獸作動，定必出手打怪獸。估計喺美息預期再有上升空間下，炒作美股嘅資金會提高警覺，隨時有避險嘅準備。美滙指數曾升0.75%至102.41，歐元回落0.71%至1.1146美元，日圓跌0.6%至158.86兌每美元。加密貨幣「一哥」比特幣一度挫1.8%，至73589美元。 至於港股昨日繼續於50日線及100日線之間整固，恒指高開172點後，一度升226點至24675高位，其後升幅收窄至108點，報24557，成交額縮減至1781億元，當中北水錄得淨流出27.39億元。至夜期時段，美國公布通脹數據較預期高，加上有聯儲局官員放鷹，令美股反彈告一段落，夜期一段度穿24300水平，其後美股跌幅收窄，夜期重返24300水平之上，今早黑期更重返24400邊沿徘徊。今早恒指低開202點，出現一個逾百點下跌裂口，早段一度重返24425高位，回補部份裂口後又回復跌勢。半日恒指報收24352，跌204點，成交額縮水至838億。樂觀嘅睇法係回調成交縮減，至於悲觀嘅係成交又愈玩愈縮，擔心又變返個陰乾格局。今日出現咗一個小型下跌裂口，但暫時尚未回補上周大型上升裂口，若然今日未能回補全個下跌裂口，並失守24300，則待大市回補裂口，首個支持為24150，如回補整個上升裂口至23950後，未能重返裂口頂部24300，則是次反彈浪則結束，如僅回補部份裂口至24150見支持，再重返裂口24300之上，則本月仍有機會再挑戰高位。