12月港股仍可看高一線
美國今晚公布小非農數據，加上鮑爺今晚有嘢講，唔知條友會唔會放鷹，隔晚美股三大指數個別發展，道指靠穩，標指跟納指偏軟，納指一直跑輸，始終啲龍頭如蘋果公司及Tesla行唔郁，而標指喺4100水平阻力唔細，亦需要啲時間整固，只要標指守得住3900支持位，美股後市仍可睇高一線。要留意係美股走勢，都係取決於息口走勢，大前題係通脹要受控，就業市場平穩，加息步伐放緩，美股自然有條件再升。至於港股噚日喺期指結算日急升近千點，今朝一度回吐逾百點，但沽壓唔大之下，半場倒升。
恒指低開63點，一度跌152點，見18052半日低位，萬八水平有支持，大市轉跌為升，一度升171點，見18376半日高位。半日恒指升40點；報收18245；國指跌3點，半日報收6233；恒科指半日靠穩，幾乎持平，報收3696。半日成交額776.71億元。留意今日係MSCI rebalancing，全日嘅成交會因此有所增加嘅，如果後市要維持升勢，撇除呢部份嘅成交，最好成交額可以維持喺1200億以上。
藍籌股個別發展，雖然中概股隔晚表現唔差，不過今早科網股表現平平，AMTJ只有美團(03690)保持上升0.5%，但騰訊(00700)、阿里(09988)跟京東(09618)半日要抖氣，分別跌1.1%，0.8%及0.5%。汽車股表現突出，吉利(00175)半日升8%，係表現最佳藍籌股，比亞迪(01211)半日亦升2.8%。內房跟物管股回吐，阿Man都講咗，內銀出手救內房，都係自救嘅一種，但暫時只能治標未能治本，經過一輪消息刺激而反彈，股價急升過後都要回歸平淡。
大笨象(00005)宣布出售加拿大業務，同時計劃派特別息，股價今早一度升2.9%，半日收47.05元，升幅略為回順。市場對呢項交易睇法普遍正面，因為今次可能派特別股息，有助安撫對於2020年曾一度暫停派息，以及呢兩年減少派息嘅投資者。不過以往傳統聖誕鐘，炒滙豐呢支歌仔已無唱好耐，今年亦唔會因為呢項交易，滙控會特別當炒，暫時48元係一個大阻力區。
整體嚟講，之前阿Man嘅預測，依家正正跟住個劇本走，早兩日回試20日及50日線，守咗，重上17000水平就再展升浪，暫時預計喺100日線18422會有較大阻力，加上噚日急升完，可能需要啲時間整固一定，18000只要守得到，後市要突破100日線再向上唔難，12月目標係19000至19500點，呢段時間可以趁有回調時收集ATMX等指數權重股。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。