【盤房來料】 港股連彈三日後再考驗廿日線(120226).docx

港股連彈三日後再考驗廿日線 美國最新就業數據顯示，當地就業市場開始穩交易員押注聯儲局減息將延後至7月份；而數據突顯美國經濟具韌性，但美國總統特朗普據報私下評估退出《美墨加協定》(USMCA)，美股噚晚表現反覆，先升後回落，低位有趁低吸納買盤，三大指數收市略為回吐，沽壓唔算大。美市收市，道指跌66點或0.13%，報50121，終止過去3個交易日連創新；標指回落不足1點，報6941；納指跌36點或0.16%，報23066。 個別股份中，玩具生產商美泰(Mattel)去年第四季假期旺季盈利表現不似預期，並估算今年盈利倒退，拖累股價收市急瀉25%，阿Man都有啲感慨，依家小朋友都醉心電子產品，傳統玩具市場正持續萎縮。叫車平台Lyft今季盈利預測令人失望，股價亦大跌17%；散戶投資平台Robinhood上季盈利大減，股價跌8.8%。IBM跌4.4%，為跌幅最大道指成份股，微軟回吐2.2%，美國運通及摩根大通齊齊跌逾2%，卡特彼勒(Caterpillar)升4.4%，為表現最強道指成份股。上周阿Man叫過吼365-368美元上車嘅MU美光，一舉突破380-400美元阻力，本來打算阻力前食一食糊，結果噚晚開市無幾耐就企穩380美元，去到中段順勢突破400美元，全晚升咗近一成，盤後再升至417美元水平，而家個阻力位上移至420-440美元，可以推個止賺去到400美元再等下，當然食半留半等亦可。至於禾賽(02525)(HSAI)噚晚跟其他中概股走軟，HSAI剛好去到上車位，而今日禾賽亦接近上車位，但後者日線圖有少少樣衰，裂口升完又整個裂口跌，變相出咗個孤島形態，未上車可以觀察多一兩個交易日先，反正下星期都放春節假，唔少缸邊友都提早收爐。 NQ噚晚就相當精彩，開市無耐一穿個分水嶺25300就倒水直落，去到25100水平反彈，盤中彈到25400-25450水平，即係噚日提及嘅支持同阻力位，兩邊都係去到第二格左右。至於今日NQ個分水嶺仍然係25300，支持25200/25100/25000，上方阻力仍然係25400/25500/25600，先睇返噚晚個區間先，暫時NQ似乎喺幾條移動平均線之間上落，喺未企穩條20日線之前，都唔似得另外兩個指數有力再創新高。 港股昨日持續反彈，不過隨住下周春節假期逼近，成交持續縮減，噚日成交額2172億元，預計至下周一半日市，成交額只會持續縮水，正因為無成交配合，港股動力亦減弱。恒生指數終止過去三個交易日反彈，今早低開55點後跌幅擴大，一度跌289點至26977半日低位，，半日跌242點或0.89%，報27023，險守27000關，由於5日線、10日線及20日線匯聚於26950-27000，短線考驗此水平不容有失，否則將順勢回補周一上升裂口即26710至26879。國企指數跌89點或0.96%，報9178；科技指數跌92點或1.68%，報5407。主板成交1272億元。港股自本周一回升後，重返20日線之上，暫時於日線保力加通道內游走，即使下周假期，估計成交將趨向淡靜，大市動力將減弱，本周仍有機會借機回補周一下跌裂口，但估計2月份內仍可保持於保力加通道內，即移動區間或於26200至27700之內，或於20日線即26900附近上落。另外，恒指服務公司將於明日公布季檢結果，由於恒生銀行(00011)已於1月底退市，估計將有新成員加入，甚至再添一兩隻新恒指成份股，以便達到增至100隻恒指成份股目標。今次季檢焦點仍為邊隻股代替恒生，目前市場估計以渣打(02888)染藍為大熱。不過渣打於過去四個月，股價已累升近三成，再高追值博率有限，宜候調整吸納。噚日汽車股落鑊，即使今日大市回吐，相關汽車股回吐壓力唔大，阿Man就吼住小鵬汽車(09868)，68至71元買入，以65元作防守，企穩73元目標80元，中線目標90元，主要睇好小鵬正由單一整車製造商，演變爲具備智能汽車底層能力嘅平台型科技公司與生態締造者，並進一步向物理AI 科技公司進階。公司憑藉自研芯片、電子電氣架構與全棧智駕自研能力，公司技術具備跨載體複用性，可向 Robotaxi、人形機器人及飛行汽車等新形態遷移，爲收入增長、商業模式升級及成長邊界拓寬奠定堅實基礎。小鵬未來將成爲中國具備稀缺性領先物理AI科技公司，多維增長引擎或將驅動價值重估，值得長線睇好。