【盤房來料】 港股反彈遇阻先向下回補上升裂口(120326).docx

港股反彈遇阻先向下回補上升裂口 美伊戰事未完，國際油價回升，美股周三個別發展，道指低開15點後，跌幅擴大至最多520點，最低報47185，收市跌289點或0.61%，報47417；標指跌25點或0.08%，報6775；納指微彈6點或0.08%，報22716。國際能源署(IEA)宣布成員國同意合共釋出破紀錄4億桶緊急石油儲備，以應對伊朗戰爭，不過，油價繼續升，紐約期油最多反彈6.64%，高見每桶88.99美元，收報87.25美元，升4.55%；布蘭特期油一度抽高6.1%，高見93.15美元，收報91.98美元，反彈4.76%。今早紐約期油再升，重返90美元水平之上，拖累亞太區股市走軟。噚晚美國公布嘅CPI 2月份消費物價指數(CPI)按年升幅維持於2.4%，符合預期不過油價若然喺戰事持續下高企，估計及後通脹有機會回升，上半年聯儲局減息機會應該微乎其微。美伊戰爭一日未結束，油價仍然高企嘅話，環球股市將持續反覆波動。 睇返噚晚美股雖然低開後盤中回升，但今早股指期貨又喺亞洲時段回落，暫時表現麻麻，阿Man睇開同持有嘅股份，暫時都係range內上上落落，未見有乜嘢大突破，似乎現階段保守少少好啲，暫時守住現有個組合，唔加又唔減住，再有深啲調整考慮加注啲優質股。至於NQ今晚個分水嶺喺24800，首個支持24700，下一支持24600，重要支持24500；至於上方首個阻力仍然喺25000，下一阻力25150-25200；至於25400阻力更大。暫時NQ呢個月嘅range都未走出24000至25400。 至於港股昨日表現反覆，恒生指數高開低走，雖然早段一度升189點，見26149高位，但午後倒跌，最多跌140點，低見25819，收市跌61點，報收25898，成交額只有2544億。雖然科技股早段反彈，但唔少重磅科技股都係高開低走，主要係內地據報限制銀行及國企等使用OpenClaw，下半場啲科技股全部倒水。今早美股期貨下跌，拖累黑期跌至25600水平，今早港股低開，恒生指數低開179點，早段A股頂得吓，恒指曾倒升33點見25932高位，但受制二萬六關後回落，一度跌374點，低見25524，半日跌318點或1.23%，報25579點；國企指數跌63點或0.72%，報8641；科指跌60點或1.2%，報收4994。下半場如恒生指數未能重返25700水平之上，企穩5日線及10日線(，大市料再向下回補周二所遺下嘅上升裂口，即恒指25442-25611及期指25357-25535機會較大。大市如完全回補上升裂口後，無法企穩於裂口頂部，即企穩於25600水平之上，調整或持續；其後能否延續反彈浪，25700-25800相當關鍵，無法企穩此水平，有機會再度考驗250日線，即25000水平，失守則順勢向下往重牛區24600-24800屠牛。但基於港股目前估值仍算合理，即使恒指再考驗25000水平，甚至跌穿往24600-24800重牛區，只要主導港股嘅北水未有大批撤走，港股中線向上大方向仍未變。