【盤房來料】 恒指連續兩日裂口低開走勢再轉弱(121126).docx

恒指連續兩日裂口低開走勢再轉弱 雲端供應商CoreWeave公布業績，成績表靚仔，兼且唱好收入前景，而人工智能(AI)獨角獸Anthropic傳尋求調升上市估值及OpenAI收入數據理想，資金再重投AI交易懷抱，美國科技股周三止跌回穩，納指100一度反彈3.07%。至於道指低開35點後，反覆跌最多176點，低見52055，其後一度倒升280點，至52512；美市收市，道指倒升254點或0.49%，報52486；標指升98點或1.31%，報7619；納指升幅削升，但收市仍升400點或1.6%，報25466。相反，金龍指數跌0.8%，似乎資金又玩返pair trade。 Nvidia行政總裁黃仁勳捲入婚外情及疑涉間諜風波，股價連瀉兩日、市值蒸發逾4000億美元後，股價周三最多反彈5.1%，至177.54美元，收市升幅放緩至2.9%。但盤後有消息指董事局有意罷免呢個多情CEO，盤後股價再破底，一度跌穿160美元，夜盤暫時喺160水平爭持。阿Man嘅短炒倉目前最重貨正正係NVDA，本來手上嘅短炒貨大均180成本，盤前上到178跟成本價僅一步之距，就係180呢個前之支持位變咗阻力，將手上嘅貨喺174減咗半，又再喺168排返買盤，至於160嘅GTC買盤未有除消，瞓醒見全部買盤中晒，個人即時醒晒，再睇下新聞心知不妙。公司下周二公布業績，目前嘅短炒貨，成本拉到169，盤後喺158-160之間徘徊，今次都咪話唔大鑊。以高位計，NVDA回咗超過三成，計及目前嘅利淡消息，正常就已price in咗，問題係一旦黃仁勳被逼宮下台，公司群龍無首，又唔知搵個乜嘢人嚟掌舵，下周業績若然有得反彈，都可能要走為上着，暫時股價上得返170-180已劏雞還神。仲有長倉嘅免本貨，都要認真考慮要唔要減磅。券商Baird將NVDA投資評級從「跑贏大市」降至「中性」，目標價從500美元大劈至200美元，指市場正觀望美國政府因應國會聽證會將有所行動。該行分析員Tristan Gerra估計可能出現兩種結果，一係Nvidia被禁止向中國輸出H200晶片，另一個可能係收緊出口管制，特別針對東南亞數據中心漏洞。全球最大主權財富基金挪威央行投資管理公司(NBIM)行政總裁Nicolai Tangen則於CNBC訪問中，讚揚黃仁勳嘅領導能力及喺公司所建立嘅成績，但唔評論佢最近捲入嘅事件。截至6月底止，NBIM持有NVDA1.3%股權。至於其他長短倉嘅貨都無郁過，美股已唔過咗順風順水坐定定大覺瞓嘅時候，不過阿Man打算呢兩日放假，下星期再睇下NVDA可以點處理。 除咗NVDA因為自身問題，噚晚AI相關股份或晶片股均狂彈，反映晶片股表現嘅Roundhill Memory ETF大彈10.4%，報44.85美元；Nebius升15.4%，Sandisk升13.7%，美光(Micron)升11.9%，希捷(Seagate)升10%，SK海力士(SK Hynix)ADR升9.7%，英特爾(Intel)升8.5%，西部數據(Western Digital)升8.3%，博通(Broadcom)升7.5%，台積電(TSMC)ADR彈4.3%，SpaceX反覆跌2.3%。雲端供應商CoreWeave及Nebius分別炒高24.7%及15.4%，甲骨文亦彈升8.8%；蘋果及Alphabet齊升約2%，微軟跌2.3%，亞馬遜回落1.7%。可惜彈得勁嘅股份，阿Man全部無份，連MU呢隻愛股都錯過，唯有再等機會。周三為美國退伍軍人節，美國債市假期休市。美滙指數曾彈0.71%至102.961，歐元則跌0.75%至1.1083美元，日圓下挫0.75%至159.94兌每美元。加密貨幣「一哥」比特幣一度轉升1%，至74603美元。現貨金則再度失守4000美元。 至於恒指昨日裂口低開202點後維持弱勢，雖然一度反彈重返24400水平，但開市所遺下嘅下跌裂口並未有完全回補，收市報24315，跌241點，成交額1807億元，似乎港股又回復陰乾格局。至夜期時段，美股科技股及AI相關股份大幅反彈，反而夜期卻持續向下，回落至24100水平，資金再度捨棄中概股，重投AI股份，今早黑期時段進一步回落，跌穿24100水平。恒指低開194點，報24121，與半日高位24132點相距不遠，遺下一個逾百點下跌裂口，已連兩個交易日裂口低開，以為好似噚日咁彈返上去補裂口，結果係連24000都見埋，低位23988，最多跌327點。半日彈返去24092收市，即管睇下午後有冇機會上返去補返多少個下跌裂口。大市半日成交1056.44億元，北水淨流入58.72億元，可惜北水連續兩日淨流入都未能改變港股見頂再回調。右然今日仍無法回補下跌裂口，則稍後回補上周四大部份上升裂口，甚至整個上升裂口已無懸念。回補上升裂口後如無法重上裂口頂部之上24300企穩，再失多條移動平均線，咁24800水平就極有可能係本輪反彈浪頂。目前10日線及10周線處於24100-24150水平，今早未能企穩，目前喺呢個水平爭持。至於50日線下移至24300水平，5日線於24400水平前，此兩線料成為短線反彈阻力。而下方5周線及20日線，即約23750-23800為重要支持，此兩線再失，11月料再見另一低位。