【盤房來料】 恒指裂口低開再見另一孤島(130226).docx

恒指裂口低開再見另一孤島 憧憬美國公布嘅通脹數據放慢，有助提高聯儲局未來減息機會，美股周四早段曾做好，道指高開48點後，升幅擴大至最多325點；但大型科技股如蘋果、IBM及思科(Cisco)等走弱，納指率先向下，市場氣氛急轉直下，道指尾段曾倒跌701點，低見49420；標指最多挫1.69%，納指曾跌2.25%。美市收市，三大指數齊跌，道指挫669點或1.34%，報49451；標指跌1.57%，報6832，連跌三個交易日；納指跌469點或2.03%，報22597。美國政府再有機會陷入停擺，加上科技股走弱，納指更失多條移動平均線，加重美股沽壓，市場借消息踩多兩腳，隔晚夜期跟ADR隨美股走軟，今早又再裂口低開。 先講返美光(MU)，盤中一度抽高近7%，高見437美元水平，但尾市收窄至不足1%，但仍未跌穿400美元短線支持，但有理無理先沽貨一半，鎖定部份盈利，另一半用返個400美元止賺再等等，甚至全數食糊過返個肥年。至於禾賽(02525)(HSAI)，都叫守到啲支持位，但都接近春節假期，唔想博過長假期，放完假返嚟再決定上唔上車亦未遲，都無謂放假期間心掛掛。既然都準備收爐，今日都無乜其他心水。至於NQ走勢都幾差，又係彈到個25400就行人止步，調頭穿25300個分水嶺就食咗瀉藥咁，晚市跌到去24800水平先見支持，但反彈上唔返25000，今朝喺亞洲時段就連24800都穿埋。暫時今晚個NQ好分水嶺24800，支持24700/24600/24500，阻力24900/25000/25200。 至於港股經過幾日反彈後，昨日低開低走，恒生指數低開55點後，跌幅一度擴大至333點，全日跌233點，收27032，險守二萬七關，成交額則減至2387億元，長假逼近料成交持續淡靜。至夜期時段，喺美股三大指數走軟下，夜期及ADR進一步下跌，ADR跌穿26700水平，夜期收26700水平，今早於黑期26700水平附近上落，今早大市裂口低開。恒生指數低開392點，一度跌494點，低見26537點，半日跌484點或1.79%，報26547點，不僅失守5日、10日及20日線，10日跌穿20日線，出現死亡交叉；國企指數跌159點或1.74%，報9015；恒科指數跌89點或1.64%，報5319。主板成交1284億元，維持淡靜。 今早裂口低開，目前又遺下一個下跌裂口，26774-26941，以裂口回補周一所遺下嘅上升裂口26710-26879，回補裂口後，若今日無法即日回補整個下跌裂口，並重上26941昨日低位，即大市又再出現另一個孤島，再次出現孤島利淡形態，雙孤島威力更大，加上跌穿5日、10日、20日及30日平均線，更失守5周線，料大市向50日線及100日線約26300-26400水平尋找支持機會大增。目前外圍市況急轉直下，美股尤其納指遲遲未有跟道指及標指創新高，更一直未能收復多條移動平均線，而港股嘅科技股表現疲弱，恒科指更早已跌穿250日牛熊分界線，如港股傳統股亦未能支撐大市企穩27000關，則後市走勢偏淡，而早前升至28000水平僅視為假突破，暫時恒指僅困於日線保力加通道內，如今日連20日線都不保，指數往下考驗50日線及100日線之餘，更有機會下試日線集保力加通道底部即約26150-26200水平尋找支持。留意港過去多個月均未有真正跌穿50及100日線，如今次確切跌穿此兩條平均線，則有機會展開一個跌浪，投資者應做好風險管理。今日大市重要支持為26300-26400，而上方反彈阻力為26800-26900。