港股能守萬六不再穿底已屬萬幸
聯儲局開始一連兩日議息會議，美國公布 11月CPI降至3.1%，當從油價及租金回落，CPI已慢慢向下，只係跌嘅速度無年初咁快。將數字細分嚟睇，能源支出下跌5.4%，之前一直因為租金高企拉高CPI，喺第三季美國租賃空置率已創兩年新高，喺供應陸續增加下，租金增幅已放緩至6.5%，估計未來兩季加快下降速度，呢個正正係市場預期通脹威脅將解除，息口有望見頂嘅原因。雖然美國11月份CPI符合預期，但按月恢復上升，顯示物價回到局方目標嘅路途並不平坦。市場第一反應係先拉高10年債息，美股借勢低開，不過美股資金充裕，低位又見買盤吸納，最終三大指數倒升，道指升173點，標指升21點，納指升100點。
不過中港股市持續疲弱，而一年兩日舉行嘅中央經濟工作會議，只強調要堅持明年穩中求進，未有再推任何實質措施，市場對口號式嘅支持已無反應，港股噚日反彈173點，今日又嘔返過百點出嚟，五日線更得而復失。恒指低開62點，一度見16326半日位，但跌勢持續，最多跌154點，見16219半日低位。中午恒指報收16252，跌121點；國指跌56點，報收5558；恒科指跌30點，報收3699。半日成交額進一步縮水至369.44億元，樂觀啲睇，沽壓唔算大，但面對現實去睇，係大市落到呢啲年內低位，仍然未見有資金入場抄底，呢個正正係港股持續弱勢，反彈乏力嘅主要原因。
重磅科網股繼續拖住大市後腿，美團(03690)跟京東(09618)半日跌逾2%，京東又失紅底。騰訊(00700)及阿里巴巴(09988)半日齊跌0.9%；百度(09888)半日跌0.3%。攜程(09961)本輪跌浪算硬淨，半日升0.2%；小米(01810)維持強勢，半日倒升1.8%，股價咁堅挺，都係令人懷疑佢等市場氣氛好少少，就向市場批股抽水。
金融股個別發展，內銀股中，又係無阿爺撐腰嘅招行(03698)表現最差，半日跌3.7%；建行(00939)跌0.6%，但工行(01398)跟中行(03988)半日逆市升0.5%及0.7%。內險股繼續腳軟，中國人壽跌(02628)跟平保(02318)分別跌1.8%及1.7%。港交所(00388)半日跌0.8%；大笨象(00005)微跌 0.1%，友邦(01299)則逆市彈1%。
內房物管股，威咗一日又謝過，中國海外(00688)半日跌3.4%；華潤置地(01109)跌3.3%；龍湖集團(00960)及華潤萬象生活(01209)跌3%；碧桂園服務(06098)跌1%。至於噚日表現突出嘅翰森製藥(03692)半日再升2.3%，係表現最好藍籌股；信義玻璃(00868)半日跌逾半成，藍籌之中跑第尾。再有六隻藍籌股再創52周低；包括美團、藥明生物(02269)、海爾智家(06690)、華潤啤酒(00291)、信義玻璃及康師傅(00322)。
雖然美國嗰邊炒緊減息，但CPI仍維持喺3%以上，明年第一季減息機會大減，美股尚有充裕資金支持，逢回吐見買盤吸納，可以高位橫行，但中港股市資金面薄弱，年結嘅粉飾櫥窗效應今年難以發揮，能夠守住現水平唔再穿底已屬萬幸。
麥狄文 利益申報 : 筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。 免責聲明 : 本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。 版權聲明: 本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。