【盤房來料】 阿爺出手為內地股市降溫(140126).docx

阿爺出手為內地股市降溫 美股噚晚略為回調，雖然12月CPI反映核心通脹較預期溫和，但美股略為高開後，三個指數好早段已掉頭回落，道指更一度跌逾500點，收市跌幅收窄至398點，報49191。道指跌幅比標指跟納指大，主要係美國總統特朗普要求信用卡機構將利率限制在10%，拖累金融股走軟。地緣局勢仍緊下，現貨金價反再破頂曾高見4634.29美元，其後升勢回順，目前仍處於4600美元水平附近，睇嚟金價今年5000美元呢個目標無乜懸念。雖然美股噚晚見調整，但沽壓唔算嚴重，而噚日提過嘅RDW就有位上車，10美元有上車，睇住個10.9同11.8阻力位食糊。有投行調高AMD其目標價至270美元，其實都好合理，近呢半年顯示漲價幅度驚人，反映市場需求殷切，AI大行其道，電腦換代時間縮短，AMD作為全球其中一間半導體及CPU同GPU龍頭企業，自然水漲船高。AMD可以喺200至220美元收集，目標250-270美元，用返個195美元做防守。另一隻阿Man愛股GOOGL，今年大有機會跑贏NVDA，成為全球市值冠軍，其AI競爭地位持續強化，Alphabet喺AI 關鍵層面上仍具備良好定位，包括大型語言模型 (Gemini)、基礎設施 (TPU)、消費者觸及 (搜尋)，以及企業端採用 (雲端與 Workspace)」等領域皆具領先優勢，長線大睇好，不妨以月供方式儲貨，今年目標價370-380美元，長線啲400美元，講緊都係現價升兩成，唔算太大想頭。至於個NQ噚晚繼續受制於個上落區間頂部26000，但似乎行緊個一底高一底，只要個趨勢持續，今晚唔穿25800，納指就有機會向上突破26000，再挑戰前頂26200至26400。畀幾個住大家，首個支持喺25800，較大支係25600，跌穿呢個位就小心啲，下方個25400支持一定唔可以跌穿，失守則會破壞整固待突破向上嘅形態。 港股方面噚日有提到只要恒指守到喺26800之上，港股升勢可持續，本周仍有條件挑戰27200-27400，結果噚日恒指收市價企到25800，今朝即高開高走，又再重返27000關。期指今早企穩咗25950噚日個大型密集區底部就開始扶搖直上，十點半後企埋27050噚日個密集區頂部更上一層樓，半日期指報收27130，走勢梗係強。但中午內地忽然公布咗個消息，經中國證監會批准，滬深北交易所發佈通知調整融資按金比例，將投資者融資買入證券時的融資按金最低比例從80%提高至100%。下午港股跟隨A股急回倒跌，期指一度打回原形，回落至26900水平，但又隨之重返27000附近，可惜未能企穩，再度重返27000水平之下。其實A股升咗18日都無一個顯著回調，而港股RSI又去到94，開始超賣，係時候做一做回調。至於港股本來就落後A股一大截，盤中隨A股上落，既然阿爺都出手要為內地股市降溫，A股就算唔大調整，點都要停一停，抖一抖。至於港股都係跟A股行，咁A股可能嚟緊短時間內，要抖氣，港股一樣可以做下整固先，或者喺26600至27100之間，整固返幾日。暫時下方先睇兩個位26800同埋26600支持，26400嘅支持更大，至於上面27000同27200短線阻力，個市企得穩27000三幾個交易日，就有條件喺本月餘下時間再向上擴大多少少月波幅。今個月暫時恒指1513點月波幅係算少嘅，但依家阿爺出咗手，A股抖氣之下，1月做個罕見啲嘅細波幅，即係少於1800點嘅平均1月份波幅，又無話唔得嘅。個股方面，噚日品題嘅中生製藥(01177)半日表現唔錯，上咗車嘅可以keep住先。今日就望緊隻藍思科技(06613)，周一做咗高位，呢兩日開始調整，走勢上當然唔係幾好睇。睇返基本因素，公司係做玻璃加工起家，業務已拓展至智能汽車、智能穿戴、人形機器人等新興領域，實現從材料研發到整機組裝嘅垂直整合，同時喺A股同港股上市。公司致力打造全球AI平台，今年主題離唔開AI產業，趁股價調整可以收集下，26元收集，用返個24元做防守，中線目標係32至34元。