【盤房來料】 北水持續流入支持港股延續反彈(140726).docx

北水持續流入支持港股延續反彈 中東地緣政治緊張局勢憂慮重燃，國際油價顯著攀升、美國債息向上，加上市場憂慮息魔來襲，拖累美股周一向下，南韓及日本記憶晶片股遭拋售，費城半導體指數收市急挫4.78%。道指高開39點後，早段一度升209點，高見52846，其後曾倒跌285點，收市道指轉跌138點或0.26%，報52498；標指跌59點或0.79%，報7515；納指跌561點或1.55%，報25873。 有報道引述韓國數據估算，6月南韓全市場累計超120萬槓桿散戶賬戶觸及保證金追繳，其中約32萬至36萬賬戶被券商全額強制平倉，即係本金歸零得個桔，有部分更輸到爆廠，倒欠券商鉱。據券商及外資機構總測算，近一個月散戶槓桿總實際損失約2.15萬億韓圜，約14.4億美元。推算有大約148萬至155萬戶被券商完全強制平倉、本金歸零爆倉賬戶料介乎40.5萬至46萬戶，其中20至30歲年輕散戶佔比62%，主要係all in買入三星電子、SK海力士兩倍槓桿ETF。有口口痕友話呢幾日海力士同三星插水，南韓唔知幾多人睇唔開會輕生，更刻薄嘅口痕友話尋死無用，債務與其留畀屋企人，倒不如賣器官還債。呢啲當笑話聽，其實都幾mean，不過經過一輪斬倉同去槓桿，反而海力士喺呢啲位，隨時會反彈，想博呢一下反彈，隻南方海力士兩倍槓桿ETF(07709)睇住個48元防守止蝕，博彈返二三十蚊，都係一個險中求勝嘅機會，不過止蝕方便就一定要嚴守紀律，再穿底可以跌到無譜。 至於美股嗰邊，同類AI存儲股全面向下，上周阿Man以為MRVL可以拾級而上，誰知當晚已跌穿返10MA，噚日盤前見連條5MA都企唔穩，原價228先落車，炒了個寂寞，上星期五有250唔落車，嫌佢雞糊太細唔食，結果成鋪牌摸和，確係罪大惡極。MU已清晒短炒倉，雖然海力士同三星跌到一仆一碌，但MU逼近條50MA，接近900水平，阿Man又忍唔住喺908上返車，短線可能炒住range先，下方880-900支持，上方1020至1050成為阻力，先喺呢個範圍高沽低渣。至於DELL，減咗半之後，暫時都係整固下先，總之390-400呢個防守位不容再失。MFST守於370之上，但388撈嘅貨，暫時都係得個等字。META喺670減咗半，防守位睇住條5MA約635，下面較大支持當然係50同100MA，大約係600-615左右。INTC又再逼近100大關，搞到阿Man心思思想上返車，之前喺118同130落晒車，舊地重遊又去返103上次個撈貨價，今晚等CPI出埋，無乜大礙嘅話，把握喺108之前上返車。NVDA上周五無落車，渣實190同195撈嘅短炒貨，上到210都有10%利潤，噚晚210盤前減返一注，又可以掛返個198睇游水成唔成功。暫時短炒嘅步署係咁先。至於NQ行晒阿Man噚日畀嘅成個波幅，上方最高仲去到30000，下方剛好去到29300-29400。至於今日暫時喺亞洲時段跌定咗，今晚NQ個分水嶺喺29450，支持29350/29250/29150，上面阻力29550/29650/29750。 港股昨日好淡角力，恒指早段低開17點後，一度轉升274點，見24449高位，但未有升破上周五高位，其後好淡爭持，全日升幅收窄至38點，報收24213，成交額3095億元，而北水則繼續錄得淨流入。連同上周北水已累計錄得淨流入接近400億元。港股踏入7月份，資金重新配置下，資金流向出現大逆轉，上半年熱炒嘅人工智能算力硬件股，近日跌到一個七皮，資金從呢啲股份，流向傳統平台股，兩類股份此起彼落。由於平台股於恒指佔比極重，平台股起死回生，亦帶動恒指回升。暫時恒指由上月低位約22500水平，累計反彈近2000點至24500水平略為停步，預計稍作整固及回測支持後，本月仍有望向上挑戰50日線。 今早恒指低開32點，報24181點，淡友隨即發難，跌幅迅速擴大至最多311點，低見23902點，其後跌勢喘定，並曾倒升最多33點，高見24247點後再轉跌。恒指半日收報24099點，跌113點或0.47%。大市半日成交1619.69億元，北水淨流入49.57億元。睇返半日成交喺整固期間無乜大沽壓，北水又持續加貨，個市再向上推進機會仍大。目前恒指首個支持為5日線約24033，下一支持約為23730即20日線，而10日線約23600為重要支持，港股即使回測呢幾個支持位，尤其20日線能守得住，料反彈之勢可持續，向上挑戰50日線約24872機會仍在，不過24800至25000此關阻力仍大，成功挑戰後要企穩亦需時。