港股要重返百日線方能扭轉弱勢
AI相關股份個別發展，銀行股業績後股價普遍插水，不過，個別企業業績理想，加上油價趨向平穩，美股雖然低開下跌，但其後跌幅收窄，主要因為紐約聯儲銀行總裁 John Williams表示聯儲局今年內再加息一次係合適做法，但目前預計明年冇加息必要。加息最怕無止境，能預知加幾多，幾時停手，有數得計，投資者個心會踏實啲。道指高開242點後，升幅一度擴大至466點，高見52317，其後一度倒跌262點，低見51587，收市道指跌180點或0.35%，報51670；標指跌1點或0.02%，報7805；納指跌41點或0.15%，報27204。避險資金流入債市，導致美國長年期債息回落。
剛公布業嘅大投行股價受壓，業績強勁嘅高盛一度升4.1%，但收市轉跌0.2%；摩根大通第三季盈利跟收入遜預期，但上調2026年淨利息收入指引，股價反覆回落0.9%；花旗份業績收入部份夠晒靚仔，但股價照跌5.6%。AI相關股個別發展，晶片股Nvidia轉升1%，INTC反彈1.4%，股價上返100安樂晒，不過115嘅短炒貨，未有耐見家鄉，擺咗個95買盤又接唔到，家下半天吊。MU則挫3.6%，盤中一度低見929，接近阿Man提到嘅880至920呢一個大支持區，忍唔住喺940買返些少，另一個買盤放咗喺890，博佢調整完上返980-1000樓上。MRVL減咗270，擺咗個242條20周線，但完全無影，股價夜盤彈到270附近，242買盤繼續擺，用個220做防守。META逆市做好，股價重上750樓上，阿Man兩注均價725嘅貨仍然喺手，今晚再睇下780阻力過唔過到。MSFT微升0.4%，報543.45美元，為去年10月以來首次創收市歷史新高，495買嘅短炒貨坐定定，暫時大約10%進帳，用個540睇住止賺。NBIS吼返個200條30周線附近上返車半注，博收市企返條30周線，暫時夜期上返209，當然要上返220先叫脫險，但噚日先低後高，有少少見底feel。DELL同GOOG暫時放埋一邊，兩股暫時短炒貨利潤唔多，但防守位無威脅過，都算係咁。CRWV仲未上返80樓上，到咗日線KC通道底76見支持，今晚再睇下80上唔上得返。MCD買咗233嘅貨，係打算做一個長線配置，暫時唔打算買賣。至於NFLX唔穿65持有。今晚美國公布CPI，阿Man 想吼下光通信嘅股份，LITE擺個980同940，用920做防守，接到貨就睇股價彈唔彈返上1000樓上。另外ALAB分別喺318同292擺咗買盤，318係10周線，292係30周線，用280做防守，暫時只係中咗318一個盤。NQ今晚分水嶺30800，支持30700/30600，穿30600嘅話要小心，下面再落就30500/30400，30350-30400不容有失，至於上方阻力30900/31000/31100，企穩31100又有機上去攻頂。
聯儲局理事Christopher Waller周二喺一個論壇上表示，長期美債債息上升有助於抑制房屋和汽車等利率敏感領域需求，達到一定程度緊縮貨幣政策作用。芝加哥聯儲銀行總裁Austan Goolsbee周二喺媒體訪問中稱，AI熱潮所催生通脹開始「越界」，開始推高經濟中原本不相關領域嘅物價。另一方面，克里夫蘭聯儲銀行總裁Beth Hammack周一演說時指出，幅度較小及更頻繁嘅政策調整，能夠有助通脹預期維持受控。美國10年期債息曾跌7.8個基點，至5.17厘；息口敏感嘅2年期債息則升2.95個基點，至4.8165厘。同時，美滙指數一度跌0.42%，報102.16；日圓最多升0.49%，至157.83兌每美元。彭博報道，日本央行官員傾向認為沒有需要於本月連續加息，但仍有可能最快12月再次上調利率。依家基本都係睇住個債息變化，資金取消較為保守，只要債息唔再爆上，美股短線都係調整下，暫時唔見得會大插。
至於港股噚日恒生指數低開99點，早段一度曾挫283點至23987，其後二萬四關失而復得，全日倒升74點或0.3%，報24,345點，為全日最高位；國企指數升6點或0.07%，報8,174點；科技指數跌32點或0.79%，報4,136點。主板成交1875億元。雖然噚日個市做咗個大V，上返5日線及10日線，但短線20日線即24450-24500阻力仍大，加上成交未能配合升勢，若然一直受制20日線，大市仍維持一浪反彈低於一浪。今早恒指低開62點，報24282後，淡友又出嚟擋，早段一度最多跌230點，低見24115後喘定，內地上月CPI、PPI及進出口數據先後登場，好友反攻，大市逐步收復失地並轉升，5日線及10日線失而復得，最多升106點，高見24451，剛剛又係畀條20日線擋住。恒指半日收報24384點，升39點或0.16%。大市半日成交僅867.39億元，北水淨流入30.58億元。暫時成交唔見太大起色，資金都係板塊之間輪動，除非企穩20日線，甚至重返100日線，即24800，方能扭轉弱勢。
Administrator
2026年10月14日