港股成交若未能配合 反彈或僅曇花一現
美國聯儲局結束一連兩日議息會議，一如預期維持利率不變。不過會後發表嘅利率點陣圖顯示，決策官員預計明年將減息0.75厘，較9月時預測多0.25厘，反映明年大約減息三次。鮑爺喺議息後記者會放鴿，暗示利率可能已經到頂，又承認本次會議開始討論減息時間點，希望實現2%通脹目標之前，顯著地降低政策利率嘅限制性。本來已強勢嘅美股，受到進一步刺激，道指逼近高位收市，升512點，創盤中新高37094及收市新37090；標指升63點，報4707；納指升200點，報14733。
重磅股中，Tesla宣布回收逾200萬輛電動車，以維修輔助駕駛系統的安全缺陷，股價曾跌3.7%，收市轉漲1%。Tesla喺200至250美元較為合理，但喺電動車行業競爭激烈下，除非毛利率得以回升，否則預估PE達70倍，估值太高。
另一重磅股蘋果公司，預估PE高達32倍，雖然iPhone 15銷量不似預期，但13及14仍然很好賣，全年出貨量由早前較樂觀預估嘅9100萬部，降至8900萬部，雖然其估值亦唔平，但盈利平穩，蘋果公司仍然係現金流之王，好多基金係會買入呢啲強現金股份，因為買入呢類股份，幾乎等同持有現金，所以股價長期易升難跌，係可以不斷創新高嘅股份。
科技股升至現水平，估值確係偏高，所以資金開始追落後板塊，零售股跟銀行股已開始見買盤。美股新高，明年開始降息，美國融資市場大幅改善，銀行壞帳有望減少，撥備減少情況下，明年銀行股盈利將有驚喜。另外受惠於投資受益有改善，美國保險股亦要留意。美國PPI增速降至2%，創3年新低，出廠價格PPI一直係CPI領先指標，從PPI走向大概領先物價走向3個月。目前中美出廠價格持續下跌，通脹自然唔再上升，
至於中港股市，都係嗰句，即使今日跟隨美股反彈，先決條件係要企穩5日線及10日線，連呢兩條線都企唔穩，反彈只係超賣下嘅弱勢反彈。大市要扭轉目前弱勢，至少要重返20日線，即17000水平企穩，並有至少1200-1300億元成交配合，否則呢一下借鮑爺放鴿反彈，都只會係曇花一現。
利益申報 : 筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。 免責聲明 : 本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。 版權聲明: 本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。