港股仍處反彈浪中 16000不容有失
11月9日，部份時間有陽光，天氣逐轉晴朗。美股等中期選舉結果，尾市仍能保持升勢，道指表現較佳，收市升333點；標指跟納指則升0.5%左右。市場普遍認為共和黨能奪回眾議院控制權後，可制衡民主黨，喺議會較為平衡嘅情況下，對美股更為有利，反之，若然民主黨仍完全控制參眾兩院，喺民主黨主張加稅之下，對美股後市不利。根據過往紀錄，喺中期選擇之後，政局明朗化，通常接住嘅一年，美股都會有平均超過一成升幅。
業績期嚟到尾升，啱啱輪到股神今年愛股OXY出業績，可惜盈利不及預期，續後股價下跌，另一重磅股迪士尼用戶增長雖超過預期，但收入及盈利則不及預期，續後股價一度跌一成，其後跌幅收窄，但仍拖累道指升幅無咗一截。中期選舉結果今日公布，接住今晚再有通脹數據CPI，10月CPI預期回落，但回落速度為關鍵，暫時10年債息仍企於4至4.2%，對科技股始終唔太利好。
美股噚晚都無乜特別，不過加密市場貨幣就爆鑊，虛幣兩大交易所幣安跟SBF互片，拖垮整個虛幣市場，上週幣安聲稱要從FTT徹資，引發FTT出現流動性危機，週二再爆出FTT跟Alameda只靠互控資產，市場擔心再有類似三箭危機出現，炒友紛紛從SBF旗下FTX提走虛幣，直接引發FTX出現流動性危機。為咗增加流動性，SBF只能接拋售比特幣及以太幣套現，結果引發整個虛幣市場急挫，前者最多跌16%，後者最多跌21%。古天后一直唔玩虛擬貨幣，就係因為本身虛擬貨幣係無實際資產支持，只係建基於互相持有，互控嘅機制之下，一旦資金流走，出現流動性問題，整個虛幣市場就會崩潰。
至於港股大方向仍處於反彈浪之中，恒指升穿20日線，尚未挑戰50日線之前，喺高位進行整固，暫時都係睇住密集底部，同埋16000點呢個大位，守得到反彈浪未完，仲係有望挑戰50日線，約17500，甚至18000水平。當然現價再追貨嘅值博率已大大減低，咁等反彈上去，就係執倉同埋減倉嘅好機會。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。